Túrikmen stýdentterine Qazaqstanda bilim alýǵa jańa múmkindikter ashylady
ASTANA. KAZINFORM — Qazaqstan men Túrikmenstan ǵylym jáne joǵary bilim salasyndaǵy yntymaqtastyqty nyǵaıtady, dep habarlaıdy QR Ǵylym jáne joǵary bilim mınıstrliginiń baspasóz qyzmeti.
Vedomsto basshysy Saıasat Nurbek Túrikmenstannyń Qazaqstan Respýblıkasyndaǵy Tótenshe jáne Ókiletti elshisi Batyr Rejepovpen kezdesti.
Kezdesý barysynda taraptar joǵary jáne joǵary oqý ornynan keıingi bilim berý men ǵylym salasyndaǵy ekijaqty yntymaqtastyqty damytý perspektıvalaryn talqylady. Atap aıtqanda, akademııalyq utqyrlyqty keńeıtý máselesi qarastyrylyp, túrkimen stýdentteriniń Qazaqstanda joǵary bilim alýǵa degen qyzyǵýshylyǵynyń joǵary ekeni atap ótildi.
— Negizgi nazar eki eldiń joǵary oqý oryndary arasyndaǵy akademııalyq almasý baǵdarlamalaryn keńeıtý máselelerine arnalyp, Túrikmenstan azamattarynyń Qazaqstan Respýblıkasynyń jetekshi joǵary oqý oryndarynda bilim alýyna qolaıly jaǵdaılar jasaýǵa erekshe mán berildi. Sonymen qatar birlesken zertteýlerdi keńeıtý, ekijaqty ǵylymı jobalardy júzege asyrý jáne tsıfrlandyrý men ınnovatsııa salalaryndaǵy ozyq tájirıbelermen almasý máseleleri talqylandy, — delingen habarlamada.
Joǵary bilikti mamandardy daıarlaýǵa erekshe nazar aýdaryldy. Túrikmenstan elshisi túrikmen jastarynyń qazaqstandyq bilim berýge dástúrli túrde joǵary qyzyǵýshylyq tanytatynyn atap ótip, mamandar daıarlaý deńgeıiniń joǵary ekenin jáne eki el arasyndaǵy mádenı jaqyndyqtyń stýdentterdiń tabysty beıimdelýine yqpal etetinin erekshe atap ótti.
Kezdesý qorytyndysy boıynsha taraptar birlesken bilim berý kórmeleri men forýmdaryn ótkizý múmkindigin qarastyrýǵa, sondaı-aq Qazaqstan men Túrikmenstannyń joǵary jáne joǵary oqý ornynan keıingi bilim berý mekemeleri arasyndaǵy tikeleı seriktestikti odan ári nyǵaıtýǵa ýaǵdalasty.
Osyǵan deıin Qazaqstan men Túrikmenstan kóshi-qon salasyndaǵy yntymaqtastyq týraly kelisimdi ratıfıkatsııalaıtynyn jazǵanbyz.
