14:32, 07 Aqpan 2023 | GMT +6
Túrkııanyń zilzala bolǵan aýmaǵynan Qazaqstan azamattaryn elge jetkizý jumystary júrgizilýde
ASTANA. QazAqparat – Túrkııanyń ońtústik-shyǵysyndaǵy alapat jer silkinisinen keıin Gazıatep qalasynan Qazaqstan azamattaryn elge alyp ketý sharalary júrgizilýde, dep habarlaıdy QazAqparat Túrkııadaǵy Qazaqstan elshiligine silteme jasap.
«Qazaqstanǵa qaıtamyn degen QR azamattary 7 aqpan saǵat 12:00 Gazıantep qalasynyń áýejaıynda tıisti protsodýradan ótip daıyn bolýy tıis. Sonymen qatar Qazaqstanǵa oralýǵa nıetti azamattar tizimin jasaý úshin +90 538 8807041, +90 3124919100 telefon nómerlerine habarlasýy kerek», - delingen Elshilik taratqan habarlamada.
Aıta keteıik, Qazaqstan Tótenshe jaǵdaılar mınıstrliginiń qutqarýshylary jer silkinisi saldaryn joıýǵa kómek kórsetý úshin Almatydan Túrkııaǵa attandy.
Onyń quramynda Qazaqstannyń respýblıkalyq jedel qutqarý jasaǵynyń qutqarýshylary, medıtsınalyq qyzmetkerler jáne qutqarýshy ıtter bar.
Tıisti tapsyrmany Qazaqstan Prezıdenti Qasym-Jomart Toqaev berdi. Bort birinshi kezekte Gazıantep qalasyna barady.
Sońǵy málimet boıynsha, Túrkııada zilzala qurbandarynyń sany 3 myńǵa jetti.
Túrkııa Prezıdenti Rejep Taıyp Erdoǵan eldiń ońtústik-shyǵysynda bolǵan joıqyn jer silkinisine baılanysty 12 aqpanǵa deıin jeti kúndik ulttyq aza tutý jarııalady.
Foto: aa.com.tr
