Túrkııanyń jetekshi mamandary jambyldyq medıtsına qyzmetkerlerin tegin oqytady
TARAZ. QazAqparat – Jambyl oblysynyń ákimi Berdibek Saparbaev pen Bashkent ýnıversıteti klınıkasynyń basqarma tóraǵasy, professor Mehmet Haberal onlaın-kezdesip, densaýlyq saqtaý salasyndaǵy strategııalyq yntymaqtastyq máselelerin talqylady. Túrik mamandary jambyldyq dárigerlerge jan-jaqty qoldaý kórsetýge, sonyń ishinde biliktiligin arttyrýǵa daıyn,- dep habarlaıdy QazAqparat tilshisi.
Aımaq basshysy Túrkııa men Qazaqstan arasynda dostyq qarym-qatynas burynnan qalyptasqanyn atap ótti. Bashkent ýnıversıtetiniń klınıkasy álemniń jetekshi bilim berý jáne medıtsınalyq mekemeleriniń biri bolyp tabylady, kóptegen elderdiń, onyń ishinde Qazaqstannyń densaýlyq saqtaýyna salasyna únemi tájirıbelik kómek kórsetip keledi.
«Biz Bashkent ýnıversıteti klınıkasynyń úzdik mamandary Qazaqstannyń ár aımaqtarynda sheberlik sabaqtaryn ótkizip, semınarlarǵa, konferentsııalarǵa qatysyp, halyqqa konsýltatsııalyq kómek beretinin bilemiz. Sonymen qatar, qazaqstandyq medıtsına qyzmetkerleri sizderdiń klınıkańyzdyń shaqyrýymen birneshe ret Ankara qalasynda biliktiligin arttyrýdan ótti. Álemde medıtsınalyq kómektiń ilgeri damyp, jetilip jatqandyǵyn, dıagnostıka men emdeýdiń jańa tehnologııalaryn engizýdi eskere otyryp, Jambyl oblysynyń medıtsına qyzmetkerleri de medıtsınalyq qyzmettiń ártúrli aspektileri boıynsha oqytýdan jáne qaıta daıarlyqtan ótýdi qajet etedi. Atap aıtqanda, kardıologııa, nevrologııa, gastroenterologııa, pýlmonologııa, nefrologııa, ınterventsııalyq kardıologııa, neırohırýrgııa, tamyr hırýrgııasy, endovıdeohırýrgııa sııaqty baǵyttardy damytý kerek. Bizdiń anestezıologtar, reanımatologtar, neonatologtar, akýsherlik jáne balalar mamandary da óz biliktilikterin arttyrýy tıis», - dedi Berdibek Saparbaev.
Óz kezeginde Mehmet Haberal osy baǵytta Jambyl oblysymen yntymaqtastyq ornatýǵa daıyn ekendikterin bildirdi.
«Biz sizderdiń medıtsınalyq qyzmetkerlerińizdi qabyldap, olardy tegin oqytýǵa daıynbyz. Sonymen qatar, medıtsınalyq uıymdar negizinde master-klastar, semınarlar, konferentsııalar jáne basqa da oqý is-sharalaryn ótkizý úshin bizdiń mamandar sizderdiń óńirge arnaıy jiberiletin bolady», - dedi professor Mehmet Haberal.
- Bıyl álemniń barlyq elderi koronavırýstyń jańa túriniń taralýyna baılanysty jahandyq qıyndyqtardy bastan keshýde. Barlyq júıelerdi, ásirese eń aldymen medıtsınalyq uıymdardyń qyzmetin jedel túrde qaıta qurýǵa týra keldi. Pandemııa medıtsınalyq uıymdardyń COVID-19 aýrýynyń mundaı jappaı taralýyna daıyn emestigin baıqatty, - dedi aımaq basshysy.
Berdibek Saparbaev qazir epıdemıologııalyq ahýaldyń jaqsaryp kele jatqanyn, koronavırýstyq ınfektsııanyń taralý qarqyny tómendegenin atap ótti. Alaıda, pandemııanyń ekinshi tolqynyna daıyn bolý kerek. Osyǵan oraı, tájirıbeni eskere otyryp, oblysta qosymsha rezervtik tesek qory qurylyp, bıýdjet jáne demeýshilik qarajat esebinen qural-jabdyqtar, test - júıeleri, dári-dármekter satyp alynýda.
«Biraq, soǵan qaramastan, biz medıtsınalyq jabdyqtarmen, shyǵyn materıaldary, jeke qorǵanys quraldarymen qosymsha jabdyqtaý qajettiligin sezinemiz. Tótenshe jaǵdaı kezindegi medıtsınalyq qyzmetkerlerdiń qaýipsizdigin qamtamasyz etý birinshi kezektegi mindet bolyp tabylady. Sondaı - aq, halyqaralyq standarttar talaptaryna saı keletin jańa medıtsınalyq nysandar salý qajet», - dedi B.Saparbaev.
Mehmet Haberal ýnıversıtettik klınıka Jambyl oblysyndaǵy medıtsınalyq uıymdarǵa gýmanıtarlyq kómek jiberýge daıyndalyp jatqanyn tilge tıek etti. Onda bir rettik jáne qaıta paıdalanýǵa bolatyn qorǵanys kostıýmderi, respıratorlar, maskalar, antıseptıkter, dári-dármekter jáne medıtsınalyq jabdyqtardyń bar ekendigi aıtyldy.
Onlaın kezdesý sońynda Berdibek Saparbaev professorǵa osyndaı mańyzdy qoldaýy úshin alǵysyn bildirip, Taraz qalasynda Bashkent ýnıversıteti klınıkasynyń fılıalyn salý máselesin qarastyrýdy usyndy. Klınıkanyń fılıaldary Eýropanyń kóptegen elderinde jumys isteıtini belgili.
