Túrkııanyń Ystambul qalasyndaǵy halyq tolqýy basylar emes.
ASTANA. 30 maýsym. QazAqparat - Taqsım aralyndaǵy ereýilder jalǵasyn tabýda. Bul jolǵy narazylyq sharasyna 10 myńǵa deıin turǵyn qatysty. Polıtsııa tártip buzǵan 20 adamdy tutqyndady. Bul týraly 24.kz habarlady.
Alańdaǵy jurt bıliktiń oppozıtsııaǵa qarsy qatań sharalardy qoldanǵanyna narazy. Olar qaýipsizdik kúshteriniń kúrdter turatyn Dııarbaqyr provıntsııasyndaǵy keshegi áreketin aıyptady. Aıta ketetini, jergilikti polıtsııa ýchaskesin betonmen qorshaýǵa qarsylyq bildirgender tártip saqshylarymen qaqtyǵysyp, nátıjesinde 1 adam qaza tapqan bolatyn. Ondaǵan adam jaraqattanǵan. Ereýilshiler qurylysshylardyń jatyn úılerin órtep jibergen. Izmır, Adana men Antalıadaǵy halyq tolqýlary tynysh ótýde. Ankaradaǵy narazy jurtty taratý úshin polıtsııa sý atqylady. Ondaǵy ereýilshiler Qyzylaı alańynda sanktsııalanbaǵan sherý ótkizbekshi bolǵan.
