Túrkııanyń Soma qalasyndaǵy qaıǵyly oqıǵaǵa baılanysty tártipsizdikter bastaldy
ASTANA. QazAqparat - Sońǵy málimetter boıynsha Túrkııanyń Soma qalasynda jergilikti shahtadaǵy jarylystan 274 kenshiniń qaza tabýyna baılanysty tártipsizdikter bastaldy. Bul týraly «Interfaks» habarlady.
Tártipsizdikke qatysýshylar úkimet basshysy Redjep Taııp Erdoǵanǵa narazylyq bildirgen, ony ury, kisi óltirýshi dep ataǵan.
Narazylyqqa shyǵyp, Ádilettilik jáne damý partııasynyń aımaqtyq bólimine bet alǵandardyń aldyna tártip saqshylarynyń tosqaýyly qoıyldy. Sonymen birge ol jerge sýatqyshtar da shaqyrylǵan. Polıtsııa qyzmetkerleriniń gaz tumyldyryǵyn kıip alǵandary da baıqalǵan. Alaıda olardyń arnaıy quraldardy qoldanǵany jaıly aqparat kelip túsken joq.
Osyǵan deıin túrik basylymdarynda kósh basyndaǵy Ádilettilik jáne damý partııasynyń depýtattary osy jyldyń sáýir aıynda Soma mańyndaǵy kómir shahtalarynyń birqatarynda, sonyń ishinde jarylys bolǵan jerde qaýipsizdikti saqtaý erejelerin tekserý týraly ótinimdi qabyldamaǵany jaıly aqparat shyqqan bolatyn.
Shetelge saparyn shegerip, Somaǵa barǵan Erdoǵan osy jaǵdaıǵa baılanysty aıyptylardyń bári jazalanady dep ýáde berdi. Qazirgi ýaqytta 400-ge jýyq qutqarýshy aman qalǵandardy izdestirip jatyr.
Esterińizge sala keteıik, 12 mamyr kúni Soma túbindegi shahtada jarylys oryn aldy. Qazirgi ýaqytta 274 kenshiniń qaza bolǵany jaıly aqparat rastaldy. Shahtadaǵylardyń kóbi ýly gazdan tunshyǵyp mert bolǵan. Jarylys kezinde oqıǵa ornynda barlyǵy 790-ǵa jýyq jumysshy bolǵan, olardyń ázirge jartysynan azyn ǵana qutqarý múmkin boldy.
