Túrkııanyń ortalyq banki lıra baǵamynyń tómendeýine baılanysty shuǵyl otyrys ótetinin habarlady
ASTANA. QazAqparat - Túrkııanyń Ortalyq banki nesıe-qarjy saıasaty boıynsha komıtettiń shuǵyl otyrysynyń erteń ótetindigin jarııalady, dep habarlady RBK. Oǵan Eýro men AQSh dollaryna shaqqandaǵy túrik lırasy baǵamynyń kúrt tómendeýi sebep bolǵan.
Bank jıyn barysynda jaqynda oryn alǵan oqıǵalar men baǵany turaqtandyrýǵa arnalǵan sharalar talqylanatynyn málimdedi. OB-nyń habarlandyrýy AQSh dollarynyń 2,3420 lıraǵa deıin nyǵaıýyna alyp keldi. Onyń búgin tańerteńgi rekordty tómen baǵamy 2,39 lıra-dollardy kórsetti. Eýroǵa shaqqanda lıra 0,5 paıyzǵa, ıaǵnı, 3,17740 lıra-eýroǵa deıin tómendedi.
Túrkııanyń qarjylyq naryǵyndaǵy bul tómendeýdiń qosymsha sebebi - memlekettik qurylys sektory salasyndaǵy jemqorlyqqa qarsy kúres sharalarynyń júrgizilýi. Ótken aptada Ortalyq bank bazalyq paıyzdyq mólsherlemeni burynǵy deńgeıde ustap turýǵa sheshim qabyldap edi. Sarapshylar banktiń paıyzdyq mólsherlemeni kótermeýiniń sebebin eldegi ekonomıkalyq ósimniń baıaýlaýymen, sonymen birge, alda kele jatqan 2014 jyldyń naýryz aıynda ótetin aımaqtyq saılaýlarmen baılanysty bolýy múmkin dep boljap otyr.
Sońǵy ret Túrkııa Ortalyq bankiniń shuǵyl otyrysy 2011 jyly ótti, onda bazalyq paıyzdyq mólsherlemeni 5,75 paıyzdan 6,25 paıyzǵa deıin tómendetý sheshimi qabyldanǵan.
Úkimet, Túrkııa ekonomıkasynyń ósimi 2013 jylǵy 3,6 paıyzdan 2014 jyly 4 paıyzǵa jetedi dep boljap otyr. Bul 2010 jáne 2011 jyldardaǵy 8 paıyzdyq ósimnen áldeqaıda tómen.
Capital Economics sarapshylary damýshy elderdegi týrbýlenttilik (onyń qatarynda Túrkııa da bar) «jańa daǵdarys» týraly sóz qozǵaýǵa negiz bolady dep otyr.
Sarapshylardyń pikirinshe, Túrkııa Federaldy qor júıesiniń AQSh memlekettik qundy qaǵazdaryn satyp alý baǵdarlamasyn toqtatý týraly sheshiminiń saldarynan «osal» elderdiń qataryna kirgen. 2013 jyly jeltoqsanda AQSh memlekettik qundy qaǵazdaryn satyp alýdyń aılyq kórsetkishi 85 mlrd-tan 75 mlrd. dollarǵa túsken.
