Túrkııanyń qyzmet kórsetý sheberligin 100 maman meńgerip shyqty
ASTANA. QazAqparat - Qazaqstan kolledjderinde dáris beretin aspazshy mamandar men qonaq úı qyzmetkerleri arnaıy kýrstan ótip, Túrkııanyń qyzmet kórsetý sheberligin úırenip shyqty. Uymdastyrýshylardyń aıtýynsha, atalǵan mamandar EKSPO aıasyndaǵy qyzmet kórsetýdiń sapasyn jaqsartyp qana qoımaı, óz tájárıbelerin keńinen tarata alady, dep xabarlaıdy QazAqparat tilshisi.
On bes kúndik semınar barysynda Túrkııadan kelgen bes maman qazaqstandyq aspazshylar men qonaq úı qyzmetkerlerine dáris oqyp, óz bilimderin tájirıbe júzinde kórsetti.
«Endi, Túrkııada kásiptik-texnıkalyq bilim berý júıesi jaqsy damyǵan. Qazaqstan biz úshin baýyrlas memleket bolǵannan keıin óz tájirıbemizdi aıamaýymyz qajet dep oılaımyn. Qazaqstannyń 100 mamany - respýblıkanyń túkpir-túkpirinen kelgen adamdar. Bizdiń endigi úmitimiz, árbir adam óz tájárıbesin kem degende, 20 stýdentke taratsa, bir jyldan keıin olardyń qatary 2000-ǵa jetedi. Sóıtip, Qazaqstannyń qyzmet kórsetý salasyn birtindep joǵary deńgeıge kóterýge ábden bolady», - deıdi TIKA-nyń Qazaqstandaǵy ókili Álı Ixsan Chaglar.
Semınarda dáris alǵan aspazshylardyń ishinde Almaty servıstik qyzmet kórsetý kolledjiniń óndiristik oqytý sheberi Nurbolsyn Ákijanov da bar.
«Bul kýrstan úırengenim - túrik asxanasynda dámdeýishterdi óte jaqsy paıdalanady eken. Sonyń arqasynda taǵamnyń dámi de, túri de basqasha bolady. Suranysy da artady. Men sol dámdeýishterdi qoldanýdy meńgerip shyqtym. Biz túske deıin teorııalyq bilim alsaq, tústen keıin taǵamdardy ózimiz istep úırendik. Endi, men osy tájirıbemdi óz stýdentterime mindetti túrde jetkizýge tyrysamyn», - dedi Nurbolsyn QazAqparat tilshisine bergen suxbatynda.
Búgin barlyq aspazshylar men qonaq úı qyzmetkerlerine arnaıy kýálikter tabystaldy. Al sharaǵa kelgen qonaqtar aspazshylardyń óz qolymen istegen taǵamdarynan dám tatyp kórdi.
Aıta keteıik, qyzmet kórsetýdiń sapasyn kóterýge arnalǵan xalyqaralyq semınardyń uıymdastyrýshylary - QR Bilim jáne ǵylym mınıstrligi men Túrkııa úkimeti janyndaǵy Halyqaralyq yntymaqtastyq jáne damý agenttigi (TIKA). Semınar Astanadaǵy qoǵamdyq tamaqtaný jáne servıs kolledjinde ótti.
