Túrkııanyń keıbir aýdandarynda qutqarýshylar izdestirý jumysyn toqtatýǵa májbúr

ASTANA. QazAqparat - Senbi kúngi keshki málimet boıynsha, Túrkııada jer silkinisinen qaza tapqandar sany 24 myńnan asty. Tiri qalǵandardy izdestirý jumystary jalǵasyp jatyr, biraq nemis jáne avstrııalyq qutqarýshylar tonaý men atys saldarynan apat aýmaǵynda jumysyn toqtatty. Bul týraly QazAqparat VVS-ge silteme jasap habarlaıdy.

Qutqarýshylardyń ózderine qaýip tóndi

Eki nemis uıymy – Germanııanyń halyqaralyq izdestirý jáne qutqarý qyzmeti (ISAR) jáne Germanııanyń tehnıkalyq kómek kórsetý jónindegi federaldyq agenttigi (THW), odan keıin taǵy birneshe uıym Túrkııanyń ońtústiginde qutqarý jumystaryn toqtatty.

«Ártúrli toptar arasyndaǵy qaqtyǵys týraly habarlar kóbeıip keledi, sonymen qatar oq atqan dybystar da estiledi», - dep túsindirdi ISAR ókili Shtefan Haıne.

ISAR jáne THW Túrkııanyń Azamattyq qorǵanys qyzmeti Túrkııa tótenshe jaǵdaılar basqarmasy (AFAD) olarǵa qaýip seıilgenin habarlaǵan jaǵdaıda izdestirý jumysyna qaıta kirisýge daıyn ekenin jetkizdi.

Buǵan deıin Avstrııa áskerıleri Túrkııadaǵy qutqarý jumysyn toqtatqan bolatyn. Olardyń ókiliniń aıtýynsha, keıbir toptar arasyndaǵy atys-shabys pen moraderlik qutqarýshylarǵa úlken qaýip týdyryp otyr.

Túrik bıligi qaqtyǵystar nemese atys týraly habarlap jatqan joq, biraq el prezıdenti Rejep Taııp Erdoǵan senbi kúni jer silkinisinen zardap shekken aımaqta tonaý faktileri bar ekenin moıyndap, bılik shara qoldanatynyna sendirdi.

Eske salaıyq, Túrkııadaǵy alapat zilzala 6 aqpan kúni Kahramanmarash-Pazardjık aýdanynda 7,7 ball qýatymen jáne Elbıstanda 7,6 ball qýatymen bastalǵan edi. Artynan 648 aftershok tirkeldi. Jerasty dúmpýi eldiń 10 provıntsııasynda, sondaı-aq kórshiles elderde, sonyń ishinde Sırııada sezildi.

Osy kúnderi zardap shekken halyqty qutqarýǵa Qazaqstan mamandary daatsalysyp jatyr.

Foto: EPA-EFE/REX/SHUTTERSTOCK