Túrkııanyń Qazaqstanǵa salǵan ınvestıtsııasy 2019 jylmen salystyrǵanda 1,3% artqan
Bul úrdiske qaramastan ótken jyly Túrkııanyń Qazaqstandaǵy ınvestıtsııalar kólemi 2019 jylmen salystyrǵanda 1,3% artyp, 362,4 mln. AQSh doll. Qurady, dep habarlaıdy QazAqparat QR Syrtqy ister mınıstrliginiń resmı saıyna silteme jasap.
Atalǵan ınvestıtsııalar kóleminiń Qazaqstannyń Táýelsizdik jyldarynda Túrkııadan jyldyq esepte tartylǵan eń úlken tarıhı rekordtyq kólem bolǵandyǵy erekshe qýantady. Bunyń aldynda eń kóp ınvestıtsııa Túrkııadan 2007 jyly 347,6 mln. doll. kóleminde jáne 2019 jyly 357,8 mln. doll. kóleminde tartylǵan bolatyn.
Qazaqstannyń Túrkııadaǵy Elshisi Abzal Saparbekuly: «Koronavırýs pandemııasyna qaramastan, 2020 jyly túrkııalyq kompanııalarmen túrli formattarda 400-den astam kelissóz ótkizip, 30 áleýetti ınvestordyń Qazaqstanǵa saparyn uıymdastyrdyq. 2020 jyldyń qorytyndysy boıynsha baýyrlas túrkııalyq kompanııalardyń ınvestıtsııalarymen Túrkistan, Soltústik Qazaqstan, Jambyl, Pavlodar, Qostanaı oblystary men Nur-Sultan, Almaty jáne Shymkent qalalarynda jalpy quny 190 mln. doll. shamasynda jańa 8 joba iske qosyldy. Jobalar qataryna Túrkistan halyqaralyq áýejaıynyń qurylysy, dymqyl maılyqtar, qaptalǵan fanera, un óndiristerimen birge medıtsınalyq dıagnostıkalyq ortalyqtardyń jáne kóp deńgeıli parkıngtiń ashylý bastamalary kiredi» dep málimdedi.
Syrtqy ister mınıstriniń orynbasary Almas Aıdarovtyń aıtýynsha: «Túrkııa baýyrlas memleket retinde qazirgi tańda Qazaqstandaǵy eń belsendi sheteldik ınvestor qataryna kiredi. Osy jyldyń sońyna deıin túrkııalyq ınvestorlardyń qatysýymen gazelektr plıtalary, kondıterlik ónimder, jaıalyqtar, mıneraldy sýlar men sýsyndar, FFP2-3 ındýstrıaldy jáne medıtsınalyq respıratorlar, tirkemeler, tyńaıtqyshtar men tómen voltty kabelderdiń óndirisi jáne qazandyq jylý kózi men tomoterapııa ortalyǵynyń qurylystaryn qamtıtyn 10 jańa jobany iske qosýdy josparlaýdamyz».
Jalpy 2023 jylǵa deıin Qazaqstandaǵy túrkııalyq ınvestıtsııalyq jobalardyń sanyn 2016 jylmen salystyrǵanda keminde eki ese arttyrý josparlanǵan.
Sonymen qatar, Túrkııa Saýda mınıstrliginiń «Túrkııanyń shet elderdegi ınvestıtsııalary týraly esebine» sáıkes sońǵy tórt jyldyń ishinde Qazaqstannyń pozıtsııasy túrkııalyq kompanııalarǵa ınvestıtsııa úshin eń tartymdy elderdiń arasynda 14 orynǵa jaqsarǵan.
Búginde óńdeý ónerkásibi men memlekettik-jekemenshik seriktestigi mehanızmi sheńberinde Qazaqstanǵa ınvestıtsııa salǵan jahandyq túrkııalyq holdıngter arasynda «Yildiz Holding», «Yildirim Holding», «YDA Holding», «Abdi Ibrahim», «Aselsan», «Anadolu Endustri Holding», «Borusan Holding», «TAV Havalimanlari Holding», «Ulkar Holding» jáne taǵy basqalary bar.
Túrkııalyq ınvestıtsııalardyń artýyna eki eldiń ózara joǵary deńgeıdegi saparlary úlken serpin berýde. Atap aıtqanda, Qazaqstannyń Tuńǵysh Prezıdenti – Elbasy Nursultan Nazarbaevtyń Ankaraǵa 2018 jylǵy, Premer-Mınıstr Asqar Mamınniń 2019 jylǵy jáne Premer-Mınıstrdiń orynbasary Muhtar Tileýberdiniń 2021 jylǵy Túrkııaǵa saparlary barysynda aıtarlyqtaı mańyzdy ýaǵdalastyqtarǵa qol jetkizilgen bolatyn.
