Túrkııanyń Qara teńiz aımaǵyndaǵy sý tasqynynan opat bolǵandar sany 44 -ke jetti

ANKARA. Anadoly -QazAqparat - Túrkııanyń Qara teńiz aımaǵyndaǵy sý tasqyny men selden zardap shekkenderdiń sany 44 adamǵa jetti. Bul týraly senbide Túrkııa úkimeti janyndaǵy Tótenshe jaǵdaılardyń aldyn alý jáne basqarý basqarmasy (AFAD) málim etti, dep habarlaıdy QazAqparat Anadoly agenttigine silteme jasap.

Habarlamaǵa sáıkes, soltústiktegi Kastamoný provıntsııasynda 36 adam, Sınopta 7 adam, Bartınde bir jergilikti turǵyn qaza tapty.

AFAD barlyq tıisti qyzmetterdiń qyzmetkerleri jergilikti jerde ekenin jáne adamdardy evakýatsııalaýdy, izdestirýdi jáne qutqarýdy jalǵastyryp jatqanyn aıtty.

Prezıdent Rejep Taıyp Erdoǵan keshe eldiń soltústigindegi tabıǵı apat aımaǵyna bardy. Memleket basshysy eldiń soltústigi men ońtústigindegi tabıǵı apattardyń saldaryn joıý úshin qoldan kelgenniń bárin jasaıtynyna sendirdi.

Túrkııanyń soltústiginde 11 tamyzda tolassyz jaýǵan jańbyr sel, kóshkin jáne sý tasqynyna sebep boldy.