Túrkııanyń Kahramanmarash qalasynda qazaqstandyqtar kıiz úı tige bastady

ASTANA. QazAqparat – Jer silkinisine baılanysty Túrkııa halqyna kómek kórsetý maqsatynda Kahramanmarash qalasynda qazaqstandyqtar birneshe kıiz úı ornata bastady, dep habarlaıdy QazAqparat tilshisi.

«Kıiz úı alǵash bolyp Kahramanmarash qalasynda ornatyla bastady. Bul kıiz úılerdiń Túrkııaǵa jetkizilgenine birneshe kún boldy. Búgin taǵy 84 kıiz úı ákeledi», – dedi qazaqstandyq tilshi Nurbek Bekbaý Instagram paraqshasynda.

Onyń aıtýynsha, Túrkııa halqyna qol ushyn sozýǵa Qazaqstannan 12 erikti keldi. Jalpy sany 100-ge jýyq kıiz úı jetkizildi.

Sondaı-aq, jerlesimiz kıiz úıdiń birinde túnep shyqqany vıdeodan baıqalady.

«Jer silkinisinen keıin kún tez sýytyp ketedi. Kahramanmarash qalasyndaǵy jaǵdaıdy baıqadyq. Dala sýyq. Biz aldymen kıiz úıde ózimiz túnep kórdik, jylylyǵyn tekserý úshin. Jylý qurylǵysy, kórpe-tósek jáne elektr plıta kerek. Bir kıiz úıge 20 adamǵa deıin sııady», - deıdi ol.

Odan bólek, «Elim-aı» fýtbol klýby da túrik halqyna kıiz úıler jetkizdi.

Qazaqstandyqtar kıiz úıler satyp alýǵa 20 mln teńgeden astam qarjy jınady. 17 mln 300 myń teńgege 45 kıiz úı satyp alyndy. Qalǵan somaǵa turmysqa qajetti zattar alyndy.

Túrkııaǵa qoldaý kórsetý jaǵynan otandyq kásipkerler de qalys qalmady. Olar 50-ge jýyq kıiz úı satyp aldy. Osylaısha qazaqstandyqtar Túrkııaǵa 100-ge jýyq kıiz úı jetkizdi.

Túrkııa eline kómek kórsetý maqsatynda jerlesimiz Nurbek Bekbaý shot ashqan. 7 aqpannan bastap atalǵan shotqa qazaqstandyqtar qaıyrymdylyq jasap jatyr.

Eske salaıyq, qazaqstandyqtar Túrkııa halqyna 100-ge jýyq kıiz úı jiberetini týraly habarlaǵan edik.

Vıdeodan alynǵan kadr