Túrkııanyń Gazıantep qalasynda taǵy bir jankeshti ózin jaryp jiberdi
ASTANA. QazAqparat - «Islam memleketi» lańkestik uıymynyń taǵy bir jankeshtisi Túrkııanyń ońtústik-shyǵys bóliginde ornalasqan Gazıantep qalasynda ótip jatqan polıtsııa operatsııasy kezinde ózin jaryp jiberdi.
Bul týraly RIA Novostı habarlaıdy.
Buǵan deıin Gazıantep gýbernatory Alı Erlıkaıa osy qaladaǵy shaǵyn aýdandardyń birinde polıtsııa operatsııasy kezinde bir jankeshti ózin jaryp jibergenin habarlaǵan bolatyn. Oqıǵa saldarynan úsh saqshy qaza taýyp, 8 turǵyn jaraqat alǵan edi.
Ekinshi jarylys qurylys alańynda boldy. Onda jankeshtini tártip saqshylary qorshaýǵa alǵan. Jaraqat alǵandar týraly málimet joq, alaıda oqıǵa bolǵan jerge jedel járdem kólikteri kelip jetken.
Tamyz aıynda atalǵan qalada úılený toıy kezinde jankeshti shabýyl jasap, 56 adam jarylys qurbany bolǵan edi. Túrkııa prezıdenti Rejep Taııp Erdoǵan bul lańkestikti «IM» jasady degen bolatyn. Al jankeshti nebary 14 jastaǵy jasóspirim ekeni anyqtalǵan.
