Túrkııanyń «Dúnııa» gazeti túrik jáne aǵylshyn tilinde «Qazaqstan» jýrnalyn shyǵardy

  ASTANA. QazAqparat - Túrkııanyń beldi saıası-ekonomıkalyq basylymdarynyń biri «Dúnııa» gazeti túrik jáne aǵylshyn tilinde qosymsha «Qazaqstan» jýrnalyn shyǵardy. Jýrnal Qazaqstan Respýblıkasynyń Prezıdenti Nursultan Nazarbaevtyń Túrkııaǵa resmı saparynyń qorytyndysyna jáne Qazaqstannyń jetistikteri men Astananyń 20 jyldyǵyna tartý retinde usynylyp otyr, dep habarlaıdy QazAqparat.

Basylymda Qazaqstan Prezıdentiniń Túrkııaǵa resmı sapary jáne Ankarada ótken Qazaqstan-Túrkııa ınvestıtsııalyq forýmy týraly keńinen aqparat qamtylǵan. Budan bólek, jýrnalǵa Túrkııa Respýblıkasynyń 11-shi Prezıdenti Abdolla Gúldiń «Astana N.Nazarbaevtyń strategııalyq kózqarasy arqyly bas qala bolyp qalyptasty», Túrkııanyń Syrtqy ister mınıstri Mevlıýt Chavýshoǵlýdyń «Túrik kásipkerleri salǵan ǵımarattar Qazaqstandy gúldendirip otyr», Qazaqstannyń Investıtsııa jáne damý mınıstri Jeńis Qasymbektiń «Trans-Kaspıı baǵyty arqyly eki el arasyndaǵy saýda damı túsedi», Qazaqstannyń Túrkııadaǵy Elshisi Abzal Saparbekulynyń «Ortalyq Azııaǵa arnalǵan sheteldik ınvestıtsııalardyń basym bóligi Qazaqstanǵa salyndy» atty maqalalary engen.

100 myń tırajben Qazaqstannyń Túrkııadaǵy elshiliginiń qoldaýymen basylǵan jýrnalda «QazaqInvest» Ulttyq kompanııasynyń basqarma tóraǵasy S.Tuıaqbaevtyń, Astana qalasynyń burynǵy ákimi Á.Isekeshevtiń, Túrkistan oblysynyń ákimi J.Túımebaevtyń, Almaty oblysynyń ákimi A.Batalovtyń, Soltústik Qazaqstan oblysynyń ákimi Q.Aqsaqalovtyń, Aqtóbe oblysynyń ákimi B.Saparbaevtyń, Pavlodar oblysynyń ákimi B.Baqaýovtyń, Batys Qazaqstan oblysynyń ákimi A.Kólginovtiń, Qaraǵandy oblysynyń ákimi E.Qoshanovtyń, Shymkent qalasynyń ákimi Ǵ.Ábdirahymovtyń, Mańǵystaý oblysynyń ákimi E.Toǵjanovtyń Qazaqstannyń óńirlik ekonomıkalyq áleýeti men ınvestıtsııalyq múmkindikteri týraly kólemdi maqalalary jaryq kórdi.

Sondaı-aq, basylymda Shyǵys Qazaqstan oblysy, Jambyl oblysy, Qostanaı oblysy men Aqmola oblysynyń sheteldik ınvestıtsııa tartý múmkindikteri týraly aqparattar men atalǵan óńirlerdiń qazirgi tańdaǵy damý kórsetkishteri jarııalandy. «Báıterek» holdınginiń basqarma tóraǵasy A.Áriphanovtyń, «Taý-Ken Samuryq» ulttyq kompanııasynyń basqarma tóraǵasy Q.Qudaıbergenniń, «Damý» qorynyń basqarma tóraǵasy A.Sarqulovtyń, «QazGeologııa» zertteý kompanııasynyń basqarma tóraǵasy Ǵ.Nurjanovtyń maqalalary men Qazaqstannyń saýda-ekonomıkalyq damýyna úles qosqan túrik kásipkerleriniń qyzyqty estelikteri men tolǵanystary da osy basylymnan jaryq kórip otyr.

Eske sala keteıik, «Dúnııa» gazeti 1952 jyldyń 1 naýryzynan bastap Ystanbul qalasynda shyǵady. Basylymnyń alǵashqy redaktory belgili jýrnalıst Fatıh Ryfky Ataı bolatyn. Qazirgi tańda «Dúnııa» gazeti «Dúnııa» kompanııalar toby tarapynan shyǵarylady.