Túrkııanyń densaýlyq saqtaý týrızmi sektorynyń kirisi 10 mıllıard dollardan asty

NUR-SULTAN. QazAqparat - Túrkııada emdelý álemniń kóptegen elderine, ásirese Eýropalyq odaq turǵyndarynyń arasynda óte tanymal. Bul týraly Antalııa halyqaralyq saýyqtyrý týrızmi jáne bilim berý qaýymdastyǵynyń (UASTED) basshysy Mehmet Kanpolat málimdedi, dep habarlaıdy QazAqparat Anadoly aqparat agenttigine silteme jasap.

Kanpolat eldiń densaýlyq saqtaý týrızmi sektorynyń kirisi prezıdent Rejep Taıyp Erdoǵannyń 2023 jylǵa qoıǵan maqsatynan asyp túskenin atap ótti.

«Bul salanyń kirisi jylyna 10 mıllıard dollardan asty», - dedi UASTED basshysy.

Uıym basshysy sheteldikter Túrkııaǵa negizinen tis emdeý, onkologııalyq jáne estetıkalyq ota jasaýǵa keletinin aıtty. Sondaı-aq ol sońǵy jyldary Túrkııada túrkitildes elderden kelgen naýqastardyń kóbeıgenine nazar aýdardy.

«Álemdegi saýyqtyrý týrızmi naryǵynyń kólemi 100 mıllıard dollarǵa jetedi. Sońǵy on jyldaǵy ınvestıtsııanyń arqasynda Túrkııa saýyqtyrý týrızmi salasynda alǵashqy bestikke endi», - dedi Kanpolat.

Bul rette ol Ýkraınada soǵys bastalǵannan keıin Túrkııadaǵy emdeý mekemelerine Reseıden kelgen naýqastardyń sany artqanyn atap ótti.

«Reseı men Ýkraına arasyndaǵy soǵys aıaqtalǵannan keıin bul elder azamattarynyń Túrkııada emdelýge degen qyzyǵýshylyǵy joǵary bolatynyna senimdimin», - dedi UASTED basshysy.