Túrkııanyń demalys oryndarynda 254 qazaqstandyq týrıst bar - mınıstrlik
«Túrkııadaǵy qazaqstandyqtardan mınıstrlik janyndaǵy Týrızm komıtetine týrıstik joldamalardyń kúshin joıý nemese qaıta brondaý týraly ótinishter túsken joq. Týrıstik joldamadan bas tartqysy keletin azamattar operatorlarǵa júgine alady. Olar ilespe komıssııalardy eskere otyryp jáne qyzmetter sharttarynda kórsetilgen shyǵyndardy shegerip, qaıta esep aıyrysýy kerek», - dedi Mádenıet jáne sport mınıstrliginiń resmı ókili Móldir Ábdiýálıeva.
Resmı ókildiń aıtýynsha, týrıstik operatorlar demalys kúnderin, baǵytyn, baratyn eldi aýystyrý jáne balama nusqa usyna alady.
«Búgingi tańda Túrkııanyń demalys oryndarynda 254 qazaqstandyq týrıst bar», - deıdi ol.
Eske salaıyq, dúısenbide Túrkııanyń ońtústik-shyǵysyndaǵy Gazıantep provıntsııasynda 6,4-6,6 magnıtýdaly, keıin 7,4 magnıtýdaly qýatty jer silkinisi boldy.
Joıqyn jer silkinisinen qaza tapqandar sany búgin 7 108-ge jetti, 40 910 adam jaralandy.
Tabıǵat apatynan keıin Astana Hub tehnoparkiniń halyqaralyq agenti Mırýs Qurmashev Hataı qalasynda joǵalyp ketti. Mırýs Qurmashevtiń taǵy úsh áriptesi baılanysqa shyqpaı qaldy.
Túrkııada, ıaǵnı zilzala aýmaǵynda qalǵan qazaqstandyqtar qaıda habarlasýǵa bolatyndyǵy aıtylǵan edi. Syrtqy ister mınıstriliginiń resmı ókili Aıbek Smadııarov málim etkendeı, Qazaqstan azamattary men olardyń týystaryna arnalǵan shuǵyl jeli jumys istep tur.
Foto: dzen.ru
