Túrkııanyń áskerı qolbasshylyǵy tolyq quramda otstavkaǵa ketti

Sebebin túsindirmesten Bas shtabtyń bastyǵy Yshık Koshaner óz ornynan ketti. Onyń sońyn ala qurǵaqtaǵy kúshterdiń, áskerı -áýe jáne áskerı-teńiz kúshteriniń bas qolbasshylary otstavkaǵa ketti, dep habarlaıdy jergilikti basylymdar. Mundaı oqıǵa Túrkııa tarıhynda alǵash ret bolyp otyr. Jandarmerııa bas qolbasshysy Nejdet Ozel ǵana óz qyzmetinde qaldy, onyń otstavkasy týraly ázirge eshqandaı habar joq.

Túrkııa qarýly kúshteri qolbasshylyǵynyń bul otstavkalary 1-4 tamyzda el premeriniń tóraǵalyǵymen ótetin Joǵarǵy áskerı keńestiń qarsańynda oryn alyp otyr. Bul keńeste túrkııa armııasynyń joǵarǵy qolbasshylyq quramy týraly sheshimder qabyldanady.

Derekkózderdiń habarlaýynsha, bul otstavkalarǵa úkimetpen aradaǵy kelispeýshilik sebep bolyp otyr. Bas shtab basshysy qarýly kúshter basshylyǵynda jasalǵaly otyrǵan taǵaıyndaýlarǵa kelispeıtindikten raport bergen. Ókimettiń áskerı qolbasshylyqqa qatysty jospary týraly ol Túrkııa Prezıdenti Abdolla Gúlmen jáne el Premeri Taıyp Erdoǵanmen bolǵan kezdesýde estip-bilgen. Bas shtabtyń baspasózge jasaǵan málimdemesinde, áskerı vedomstvo basshysynyń otstavkaǵa «óz erkimen» ketkeni ǵana aıtylady.

Áskerı qolbasshylardyń otstavkasyna baılanysty Úkimet basshysy Erdoǵan Ystambulǵa iskerlik saparyn keıinge qaldyrýǵa májbúr bolyp otyr. Premer, «Joǵarǵy áskerı keńes otyrysynda jasalatyn taǵaıyndaýlarǵa qatysty daǵdarys» kútpegenin málim etti.

Yshyk Koshaner túrik armııasynyń bas qolbasshylyǵyna 2010 jyldyń tamyz aıynda, ókimet áskerı qastandyqtyń betin ashqannan keıin taǵaıyndalǵan bolatyn. Al ol ymyraǵa qatystylardyń bári memlekettik tóńkeris uıymdastyrmaq boldy dep aıyptaldy, túrik armııasynyń 40-tan astam generaly men admıraly áli qamaýda otyr. Sarapshylar, áskerılerdiń «narazylyq» otstavkalary osymen baılanysty bolýy yqtımal ekenin joqqa shyǵarmaıdy.

Túrkııada armııa úlken bedelge ıe. Joǵarǵy áskerı shender elde úsh ret - 1960, 1971 jáne 1980 jyldary áskerı tóńkerister uıymdastyrǵan. Armııanyń qysymymen 1990 jyly ıslamshyl premer Nejmettın Erbaqan bılikten ketken bolatyn. Al qazir Bas shtab Erdoǵan bastaǵan qazirgi úkimet Túrkııada ıslamdandyrý úrdisin júrgizýde dep aıyptap otyr, biraq premer muny teriske shyǵarýda.