Túrkııanyń alty provıntsııasynda orman órtenip jatyr

ANTALIıA. ANADOLY – QazAqparat – Túrkııanyń birneshe provıntsııasynda orman órtiniń taralýyn toqtatý jáne sóndirý úshinshi kúnge jalǵasty, dep habarlaıdy QazAqparat Anadoly agenttigine silteme jasap.

Búgin tústen keıin Antalııa, Adana, Mersın, Mýgla, Osmanııe jáne Kaıserı provıntsııalarynda iri órt oshaqtary áli de bar.

3 ushaq, 9 dron, pılotsyz tikushaq, 38 tikushaq, 680 órt sóndirý mashınasy, 55 ózge de tehnıka, 4 000 órt sóndirýshi orman órtterin sóndirip jatyr.

Túrkııanyń aýyl sharýashylyǵy jáne orman sharýashylyǵy mınıstri Bekır Pakdemırlı órtpen kúreste oń dınamıka baıqalǵanyn aıtty.

Orman alqaptaryndaǵy 57 órt oshaǵy baqylaýǵa alyndy, dep habarlady mınıstr.

Buǵan deıin Antalııadaǵy órt saldarynan úsh adam, Marmarıste bir adam qaıtys boldy dep habarlanǵan bolatyn. Zardap shekken 138 turǵyn aýrýhanaǵa jetkizilgen, bireýiniń jaǵdaıy aýyr dep baǵalanady.

Buǵan deıin habarlanǵandaı, Túrkııa Respýblıkasy Úkimetiniń janyndaǵy tótenshe jaǵdaılardyń aldyn alý jáne joıý basqarmasynyń (AFAD) aqparaty boıynsha, órt 28 shildede túski ýaqytta provıntsııanyń tórt aýdanynda shyqqan. Órttiń bulaısha jyldam taralýyna kúnniń ysýy jáne qatty jel yqpal etti. Jer ústi qyzmetteri men órt sóndirý avıatsııasy apatpen kúresýde.

«Órt kezinde qaza tapqandar men ondaǵan jaralanǵandardyń arasynda bizdiń azamattarymyz joq», – dep habarlady 29 shildede Qazaqstan Respýblıkasynyń Túrkııa Respýblıkasyndaǵy elshisi Abzal Saparbekuly.