Túrkııanyń 107 jastaǵy turǵyny koronavırýstan jazyldy
YSTANBUL. ANADOLY - QazAqparat – Túrkııanyń 107 jastaǵy turǵyny Havahan Karadenız SOVID-19 koronavırýsynan aıyqqan álemdegi eń qart áıelderdiń biri boldy, dep habarlaıdy QazAqparat Anadoly agenttigine silteme jasap.
Karadenız myqty ımmýndyq júıesiniń arqasynda SOVID-19-dan bir aptanyń ishinde emdelip shyqty.
Qart áıeldi Ystanbul ǵylymı-zertteý klınıkasyna 7 sáýirde ornalastyrǵan. Ol qatty jótelip, dene qyzýy kóterilgen. 107 jastaǵy áıelge koronavırýsqa jasalǵan test oń nátıje kórsetti. Ol bir aptadan keıin aýrýhanadan emdelip shyqty. Qazir ol úıinde, 14 kúndik karantınde jatyr.
Aýrýhana qyzmetkerleri onyń qaýipti indetti tez jeńip shyqqanyna tańǵaldy. Dárigerlerdiń pikirinshe, áıeldiń ımmýndyq júıesi myqty.
Karadenız Malate provıntsııasynda Potıýrge aýdanynda týǵan. Ol 8 jasynda otbasymen birge Ystanbulǵa kóship kelgen. Onyń jubaıy 1982 jyly qaıtys bolǵan. Karadenızdiń tórt balasy, 11 nemeresi jáne 15 shóberesi bar.
Keıýana óz jasyna qaramastan kún saıyn tańerteń erte turyp, namaz oqıdy. Ol tamaqtanýǵa asa mán berip, tańǵy asqa sary maı, qaımaq, bal, sút paıdalanady. Ájeıdiń holesterın jáne qant deńgeıi qalypty normada, ol táttiler men jemisterdi jaqsy kóredi. Áıelge eshqashan ota jasalmaǵan, onyń este saqtaý qabileti jaqsy.
