Túrkııanyń jaǵalaý kúzeti 1,6 tonnadan astam esirtki tárkiledi
ASTANA. KAZINFORM – Túrkııanyń jaǵalaý kúzeti bıylǵy jyldyń basynan beri eldiń aýmaqtyq sýlarynda zańsyz esirtki tasymalynyń 54 jaǵdaıyn toqtatty, dep habarlaıdy Kazinform agenttiginiń Ankaradaǵy menshikti tilshisi.
Tıisti vedomstvolardyń habarlaýynsha, Túrkııanyń jaǵalaý kúzeti jyl basynan beri teńizdegi 54 arnaıy operatsııa barysynda 1,6 tonnadan astam esirtki zattaryn tárkiledi.
Tekserý barysynda sondaı-aq 19 591 dári, 640 kannabıs ósimdigi jáne 2 mıllılıtr suıyq esirtki anyqtalǵan. Budan basqa, qyzmetkerler 32 bólek arnaıy operatsııa kezinde 152 tapansha, 395 oq-dári, atys qarýynyń 115 bólshegin jáne tórt myltyq tárkiledi.
Bul rette kedendik tekserýler nátıjesinde 215 myńnan astam kontrabandalyq taýar, 8 myńǵa jýyq temeki qoraby, 5650 sıgara jáne 221 kg temeki anyqtaldy. Quqyq qorǵaýshylar sonymen qatar 20 402 lıtr kontrabandalyq otyndy tárkilep, salyqsyz satýǵa arnalǵan 632 225 lıtr dızel otynynyń zańsyz paıdalanǵanyn anyqtady.
Túrkııa qyzmeti jyl basynan beri buǵazdardaǵy 189 kemege kúzet qyzmetin kórsetti. Taǵy 1656 keme 2024–2025 jyldary qorǵaldy.
Osy arada bılik teńizdi lastanǵany úshin 141,33 mln túrik lırasy (shamamen 3,67 mln dollar) kóleminde aıyppul saldy, 219 buzýshylyq boıynsha sanktsııa salyndy.
Elde kontrabanda, esirtki tasymaly jáne basqa da qylmystyq áreketterge qarsy turý úshin teńiz shekarasyn baqylaý kúsheıtilgen.
Osyǵan deıin Túrkııa kedeni tórt aıda 750 mln dollarlyq kontrabandanyń jolyn keskenin jazdyq.
