Túrkııanyń Trabzon qalasynan Sochıge parom qatynasy qaıta jandandy

ASTANA. KAZINFORM — Túrkııa men Reseı arasynda parom qatynasy qaıta ashyldy, dep habarlaıdy Kazinform agenttiginiń menshikti tilshisi. 

Uzaq úzilisten keıin Qara teńizde eki el arasyndaǵy parom jelisi qaıta iske qosyldy. Seabridge kemesi Trabzon portynan shyǵyp, Reseıdiń Sochı qalasyna baǵyt aldy.

Belgili bolǵandaı, keme Trabzonnan Sochıge alǵash ret shamamen 14 jyldan keıin jolǵa shyqqan. Jol shamamen 12 saǵatqa sozylady, al bıletterdiń baǵasy 70 dollardan bastalady. Kemeniń qozǵalysyn Marine Traffic servısi arqyly naqty ýaqytta baqylaýǵa bolady.

Keme 450 jolaýshy men 200 kólikke arnalǵan. Alǵashqy reıske nebári 20 adam shyqqanymen, kompanııa ókili Mustafa Chakyrdyń aıtýynsha, baǵytqa degen qyzyǵýshylyq joǵary.

– Qazir bizge tek Túrkııadan ǵana emes, kórshi elder — Grekııa, Bolgarııa jáne Rýmynııadan da qońyraý túsip jatyr. Ásirese jazda jáne mektep demalysy kezinde suranys artatynyna senimdimiz. Bul baǵyttyń qaıta jandanýyna úmittimiz, – dedi ol.

Joldyń ashylýyna oraı jolaýshylarǵa otyratyn oryndardyń ornyna kaıýtalar usynyldy. Sochıde parom krýız aılaǵynda toqtaıdy, onda bılet satý keńsesi de ashylǵan. Bul bastama eki el arasyndaǵy týrızm men saýdany damytýǵa serpin beredi dep kútilip otyr.

Buǵan deıin Túrkııada iri altyn ken orny tabylǵany týraly jazǵan edik.