Túrkııanyń taý shańǵy kýrortyndaǵy órt: qaza tapqandar sany 76-ǵa jetti

ASTANA. KAZINFORM - Seısenbige qaraǵan túni Túrkııanyń Bolý provıntsııasyndaǵy Kartalkaıa taý shańǵysy kýrortyndaǵy qonaqúıden órt shyqty, dep jazady VVS. 

- Qaza tapqandar sany 76-ǵa jetti, - dep habarlady ishki ister mınıstri Alı Erlıkaıa.

Buǵan deıin ol 51 adam qaza tapqanyn habarlaǵan. Zardap shekkenderdiń keıbiriniń jaǵdaıy aýyr. 

Órt 12 qabatty (basqa derekter boıynsha 11 qabatty) Grand Kartal qonaqúıinde jergilikti ýaqyt boıynsha 03:27-de bastalǵan. Qazir Túrkııadaǵy jalpyulttyq eki aptalyq mektep demalysy bastaldy jáne shańǵy maýsymynyń qyzýyna baılanysty qonaqúıde 234 adam bolǵan.

Bolý gýbernatory Abdýlazız Aıdyn aldyn ala málimet boıynsha, órttiń qonaqúıdiń tórtinshi qabatyndaǵy meıramhana aımaǵynda bastalyp, joǵarǵy qabattarǵa taraǵanyn aıtty. Qonaqúı Bolýdyń ortalyǵynan birshama qashyqtyqta ornalasqan. Órt sóndirýshilerge oqıǵa ornyna jetý úshin bir saǵattan astam ýaqyt qajet boldy.

Qutqarý jumystary tańerteńge deıin jalǵasty, qutqarýshylardyń qonaqúıdiń keıbir bólikterine ázer jetkeni habarlandy. 

Túrik aqparat quraldarynyń habarlaýynsha, kem degende eki adam qonaqúı terezesinen sekirip,  qaza tapty. Keıbiri tósek jabyndylarynan arqan jasap sekirýge tyrysty. 

Shańǵy nusqaýshysy Nechmı Kepchetýtan túrik telearnasyna qonaqúıdi jaqsy biletindikten qutylyp shaqqanyn, al onyń qurylymymen tanys emes qonaqtardyń joly bolmaǵanyn aıtty.

- Adamdar terezeden: «qutqaryńyzdar» dep aıqaılady. Óıtkeni ishte tútin boldy. 20-25 adamdy shyǵaryp aldyq, - dedi ol NTV telearnasyna bergen suhbatynda. 

Órttiń shyǵý sebebi ázirge belgisiz. Ádilet mınıstri Iylmaz Týnch tergeýge prokýratýranyń da qosylǵanyn aıtty.

Túrkııa prezıdenti Rejep Taıyp Erdoǵan qaza tapqandardyń týystaryna kóńil aıtty. Atalǵan oqıǵaǵa baılanysty Túrkııada bir kúndik qaraly kún jarııalandy.