Túrkııanyń soltústik-batysynda orman órti órship tur
ASTANA. KAZINFORM — Órt úsh aýdandy sharpydy, al bılik búkil Túrkııa boıynsha orman órtine qatysty 12 kúdiktini ustaǵanyn habarlady, dep habarlaıdy Kazinform agenttiginiń Ankaradaǵy menshikti tilshisi.
Túrkııanyń soltústik-batysyndaǵy Býrsa provıntsııasynda tańerteń úsh jerde orman órti boldy. Órt Kestel okrýginiń Derekyzyk jáne Aktashtape aýdandarynda, sondaı-aq Ýlýdag taýynyń etegindegi Iyldyrym okrýginiń Karapynar qalasynda boldy.
Orman sharýashylyǵynyń aımaqtyq basqarmasy oqıǵa ornyna eki tikushaq, segiz sý tasýshy kólik, úsh tsısterna, alty órt sóndirý kóligi jáne tórt býldozer jiberdi. Órt sóndirý jumystaryna jandarmerııa, qalanyń órt sóndirýshileri jáne jergilikti turǵyndar da qatysty. Qatty jelge qaramastan, qutqarýshylar jalyndy aýyzdyqtaı aldy.
Túrkııanyń ádilet mınıstri Akın Gıýrlek órtter aıasynda 1 maýsymnan beri 25 provıntsııada bolǵan 73 orman órtine qatysty 12 kúdiktiniń tutqyndalǵanyn habarlady. Taǵy 21 adamǵa qatysty sot baqylaýy sharalary qabyldandy.
Bartyn ýnıversıteti orman sharýashylyǵy fakýltetiniń sarapshysy Halıl Barysh Ozel turǵyndardy ormandy aımaqtardan aýlaq júrýge shaqyrdy. Onyń atap ótýinshe, qatty jel, joǵary temperatýra jáne tómen ylǵaldylyq jańa órtterdiń paıda bolý qaýpin arttyryp otyr.
Bılik sondaı-aq kólik joldary boıymen eni 20 metrlik órtke qarsy jolaqtar jasap, órttiń taralýyn boldyrmaý úshin ósimdikterdi mıneraldy topyraq qabatyna deıin tazartyp jatyr.
Osyǵan deıin Túrkııada 44 orman órtine qatysty tergeý júrgizilip, kúdiktiler qamaýǵa alynǵanyn jazdyq.
