Túrkııanyń Sırııaǵa un eksporty 110%-ǵa ulǵaıdy
ASTANA. KAZINFORM — Túrkııanyń Sırııaǵa un jetkizý kólemi 650 myń tonnaǵa jetti. Bul rette qurǵaqshylyq, kóktemgi úsik jáne bıdaı ımportyn retteýdegi ózgerister saldarynan eldiń jalpy un eksporty qysqarǵan.
2025 jyly Túrkııanyń Sırııaǵa un eksporty ótken jylmen salystyrǵanda 110%-ǵa ósip, 650 myń tonnany qurady. Bul jóninde Halyqaralyq dıirmenshiler jáne astyq treıderleri qaýymdastyǵynyń (IAOM) Eýrazııalyq bólimshesiniń tóraǵasy Eren Gıýnhan Ýlýsoı málimdedi.
Onyń aıtýynsha, jyldyq óndiristik qýaty 32 mln tonnany quraıtyn túrik kásiporyndary is júzinde shamamen 15 mln tonna un óndiredi. Túrkııa álemdik naryqtyń 23%-yn ıelenip otyr jáne sońǵy on jyl qatarynan álemdegi eń iri un eksporttaýshy el mártebesin saqtap keledi.
Sonymen qatar, 2025 jyly Túrkııanyń jalpy un eksporty azaıǵan. Buǵan deıin eksport kólemi 3 mln tonnadan assa, keıingi kezeńde 2,4 mln tonnaǵa deıin tómendegen. Buǵan aýyl sharýashylyǵyndaǵy úsik, qurǵaqshylyq jáne bıdaı ımportyn retteýdegi ózgerister sebep bolǵan.
Eksportqa qosymsha qysym Túrkııa úshin eń iri naryqtardyń biri – Irakqa jetkizilimniń kúrt azaıýynan týyndady. Osy jaǵdaıda Sırııaǵa eksporttyń aıtarlyqtaı ósýi túrik unynyń syrtqy jetkizilimderin qaıta bólýge áser etken negizgi faktorlardyń birine aınaldy.
Buǵan deıin 2024 jyldyń qazan aıynda Túrkııa bıdaı ımportyna qoıylǵan shekteýlerdi jeńildetkeni habarlanǵan bolatyn. Bul qadam kúrdeli ekonomıkalyq jáne azyq-túlik jaǵdaıynda mańyzdy sheshim retinde baǵalandy.
El úkimeti túrik dıirmen kompanııalaryna shetelden astyq ımporttaýǵa ruqsat berdi. Alaıda negizgi shart bar: satyp alynatyn bıdaıdyń keminde 85%-y Túrkııanyń memlekettik azyq-túlik satyp alý agenttiginen alynýy tıis.