Túrkııanyń parfıýmerııa qoımasyndaǵy órt: alty adam qaza tapty
ASTANA.KAZINFORM - Túrkııanyń soltústik-batysyndaǵy Kodjaelı provıntsııasynyń Dılovasy ónerkásiptik aýdanyndaǵy parfıýmerııa jáne kosmetıka qoımasynda iri órt shyqty, dep habarlaıdy Kazinform agenttiginiń menshikti tilshisi.
Jergilikti bılik organdarynyń málimetinshe, órtten alty adam qaza taýyp, bir adam jaraqat aldy.
Órt búgin tańerteń parfıýmerııa óndirisinde qoldanylatyn tez tutanatyn hımııalyq zattar saqtalatyn qoımada bolǵan. Jalyn búkil ǵımaratty sharpydy. Oqıǵa ornyna órt sóndirýshiler, qutqarý qyzmetteri, polıtsııa jáne Túrkııanyń apattardyń aldyn alý jáne joıý basqarmasynyń (AFAD) qyzmetkerleri keldi.
Órtti sóndirgennen keıin qutqarýshylar qoıma ishinen alty adamnyń denesin tapty. Bir adam aýrýhanaǵa jetkizildi. Bılik qaıǵyly oqıǵanyń sebebin tergep jatyr.
Kodjaelı gýbernatorynyń keńsesi málimdemesinde órt tolyǵymen sóndirilip, tergeý bastalǵany habarlandy.
Buǵan deıin Túrkııa qonaq úıindegi órtke baılanysty 11 adam ómir boıy bas bostandyǵynan aıyrylǵanyn habarlaǵan edik.