Túrkııanyń oıyn ındýstrııasy $1 mlrd-tan asty
ASTANA. KAZINFORM — Túrkııanyń oıyn naryǵy 2025 jyly 1,01 mlrd AQSh dollaryna jetti. Bul týraly Kazinform agenttiginiń Ankaradaǵy menshikti tilshisi habarlaıdy.
Ekonomigazetesi.com basylymynyń jazýynsha, eldiń oıyn ındýstrııasy turaqty ósim kórsetip keledi, al belsendi oıynshylar sany 50 mln adamǵa jýyqtaǵan.
Gaming in Türkiye MENA EU kompanııasy daıyndaǵan «Türkiye Oyun Sektörü Raporu 2025» esebine sáıkes, 2025 jyly Túrkııadaǵy beıneoıyndar naryǵy ótken jylmen salystyrǵanda 25%-ǵa ósip, alǵash ret 1 mlrd dollar mejesinen asyp, 1,01 mlrd dollarǵa jetken.
2024 jyly naryq kólemi shamamen 810 mln dollar dep baǵalanǵan. Túrik lırasyna shaqqanda ósim 51%-dan asqan.
50 mln-ǵa jýyq oıynshy
Elde shamamen 77 mln ınternet paıdalanýshy bar. 16–74 jas aralyǵyndaǵy azamattar arasynda ınternettiń taralý deńgeıi 90,9%-ǵa jetken. Belsendi oıynshylar sany 50 mln adamǵa jýyq. Aýdıtorııa jynysy boıynsha teńdeı bólingen: 46%-y áıelder, 54%-y erler.
Bıylǵy esep turaqty oıyn kompanııalarynyń tizimin jarııalaýdan bas tartyp, taldaýǵa basymdyq bergen.
Atap aıtqanda, oıyn stýdııalarynyń platformalar, geografııa jáne óndiristik qýat boıynsha bólinisine nazar aýdarylǵan. Bul ekojúıeniń jyldam ózgerýi men jańa stýdııalardyń kóbeıýine baılanysty.
Ekspansııadan turaqtylyqqa kóshý
Ozan Aıdemır, Gaming in Türkiye MENA EU kompanııasynyń bas dırektory, oıyn ındýstrııasyndaǵy baqylaýsyz jahandyq ósim dáýiri aıaqtalǵanyn atap ótti.
Onyń aıtýynsha, endi basty nazar jańa paıdalanýshylardy tartýǵa emes, aýdıtorııany ustap qalýǵa jáne turaqty oıyn qaýymdastyqtaryn qalyptastyrýǵa aýdarylady.
Sondaı-aq ol ınvestıtsııalyq ahýaldyń tańdaýly sıpatqa ıe bolǵanyn, alaıda ınvestorlardyń shyǵý mámileleri jalǵasyp jatqanyn aıtty. Bul Túrkııa naryǵynyń áleýeti saqtalǵanyn kórsetedi.
Sala damýyna tsıfrlyq ınfraqurylymnyń jetildirilýi de áser etýde.
Ulttyq baılanys retteýshisiniń derekterine sáıkes, keń jolaqty jáne talshyqty-optıkalyq ınternet kórsetkishteriniń jaqsarýy oıyn sapasyna tikeleı yqpal etedi. Oıyn endi jaı kontent emes, tehnologııa, qoljetimdilik jáne qaýymdastyqty biriktiretin keshendi tsıfrlyq servıs retinde qabyldanýda.
Buǵan deıin Túrkııada adamdar ınternetti kúnine orta eseppen 7 saǵattan astam paıdalanatyny habarlanǵan edi.