Túrkııanyń Ortalyq banki negizgi mólsherlemeni burynǵy deńgeıde qaldyrdy
ASTANA. KAZINFORM — Túrkııanyń Ortalyq banki Erdoǵannyń paıyzdyq mólsherlemelerdi tómendetý ınflıatsııany tómendetýge yqpal etedi degen málimdemesine qaramastan negizgi paıyzdyq mólsherlemeni 50 paıyz deńgeıinde qaldyrý týraly sheshim qabyldady. Bul týraly Kazinform agenttiginiń menshikti tilshisi habarlady.
Bank málimdemesinde 2024 jyldyń naýryz aıynda keıinge shegerilgen negizgi paıyzdyq mólsherlemeni ustap turý týraly sheshim bazalyq ınflıatsııanyń tómendeýi, ishki suranystyń báseńdeýi jáne ınflıatsııalyq boljamdardyń jaqsarýy sııaqty birneshe faktorlarǵa baılanysty bolǵany aıtylǵan.
Bul rette Túrkııanyń Ortalyq banki ýaqytsha faktorlardyń áserinen óńdelmegen azyq-túlik ónimderi baǵasynyń ósýi eldegi ınflıatsııalyq qysymnyń negizgi sebepteriniń biri bolyp qala beretinin atap ótti. Degenmen, bılik bul ózgeristerdiń qysqa merzimdi ekenine jáne uzaq merzimdi ekonomıkalyq maqsattarǵa áser etpeıtinine senimdi.
Túrkııanyń bas qarjy retteýshisi ınflıatsııanyń turaqty tómendeýi jáne 5 paıyzdyq maqsatty deńgeıge jetkenshe qatań aqsha-nesıe saıasatyn ustanatynyn basa aıtty. Nesıe jáne depozıt naryqtarynda kútpegen ózgerister bolǵan jaǵdaıda olardy turaqtandyrý boıynsha qosymsha sharalar qabyldanatyn bolady.
Qatań nesıe saıasatyn júrgizý baǵanyń ósýin ustap turýdy jáne ınvestorlardyń túrik ekonomıkasyna senimin nyǵaıtýdy jalǵastyrady. Alaıda, ınflıatsııalyq maqsatqa tabysty qol jetkizý tek aqsha-nesıelik sheshimderge ǵana emes, sonymen qatar syrtqy jáne ishki faktorlardyń dınamıkasyna, onyń ishinde álemdik ekonomıkalyq úrdisterge baılanysty bolady.
Qazan aıynda aqsha-nesıe saıasaty komıtetiniń otyrysynda eldiń Ortalyq banki de negizgi paıyzdyq mólsherlemeni 50 paıyz deńgeıinde ózgerissiz qaldyrý týraly sheshim qabyldady.
Buǵan deıin Túrkııada jalǵan dollar jasaıtyndar kóbeıip ketkeni týraly jazǵanbyz.
