Túrkııanyń ońtústik-shyǵysynda jappaı tártipsizdik ornady
VAN. KAZINFORM – Túrkııanyń Van qalasynda oppozıtsııalyq kandıdattyń saılaýdaǵy jeńisiniń joıylýy saldarynan narazylyq sherýi bastaldy. Bul eldiń ońtústik-shyǵysyndaǵy birqatar provıntsııadaǵy jappaı tártipsizdikke ulasty.
Eldiń Ádilet mınıstrligi kúrdterdi qoldaıtyn «Teńdik jáne demokratııa partııasynan» (DEM) merııaǵa kandıdat Abdýllah Zeıdandy saılaý jáne saılaný quqyǵynan aıyryp, mýnıtsıpalıtet basshysy laýazymyn alý múmkindigin bıliktegi «Ádilet jáne damý partııasynan» kandıdat Abdýlhat Arvasqa berdi.
Osydan keıin A.Zeıdannyń jaqtastary ony qoldaý úshin mıtıngige shyqty. Van provıntsııasynda narazylyq sherýleri bastalyp, birneshe saǵattyń ishinde tártipsizdikke ulasty.
Keıinnen eldiń ońtústik-shyǵysyndaǵy Hakkarı, Dııarbakyr, Batman, Adana jáne basqa da provıntsııalarynyń turǵyndary da Túrkııa Ádilet mınıstrliginiń sheshimine narazylyq bildire bastady.
Van provıntsııasy merine kandıdat A.Zeıdan 31 naýryzda ótken saılaýda 50,48% daýyspen jeńiske jetse, onyń bıliktegi partııadan qarsylasy A.Arvas elektorattyń 27,15% qoldaýyna ıe boldy.
A.Zeıdannyń jeńisiniń joıylýyna kúrd saıasatkeriniń buryn sottalǵany negiz boldy. Sonaý 2016 jyly ol terrorlyq uıymdarǵa kómektesti degen aıyppen ustalyp, segiz jylǵa bas bostandyǵynan aıyryldy. 2022 jyly shartty túrde merziminen buryn bosatyldy.
DEM partııasynyń jaqtastary uıymdastyrǵan qala kóshelerindegi jappaı tártipsizdikter áli de jalǵasyp jatyr. Azamattar men polıtsııa arasynda qaqtyǵys bolyp jatyr. ІІM arnaıy jasaqtary sherýshilerdi taratý úshin sý atqyshtar men kózden jas aǵyzatyn gaz qoldanyp jatyr. Ońtústik-shyǵys provıntsııalarynyń kóshelerinde pýlemet atysynyń daýsy estiledi.
Jaǵdaıdyń shıelenisýine baılanysty, belsendi sharalar aıasynda el bıligi narazylyq aktsııalaryna qatysýy múmkin adamdardyń Van provıntsııasyna kirip-shyǵýyna tosqaýyl qoıdy.
Tártipsizdik saldarynan qaza tapqandar men zardap shekkender týraly aqparat túsken joq.
31 naýryzda Túrkııada respýblıka azamattary qala merleri men mýnıtsıpalıtet basshylaryn saılady.
