Túrkııanyń ońtústiginde polıtsııa tikushaǵy apatqa ushyrap, eki ushqysh qaza tapty

ASTANA. KAZINFORM - Túrkııanyń ońtústigindegi Gazıantep provıntsııasynda polıtsııa tikushaǵy apatqa ushyrady: eki ushqysh qaza taýyp, bir tehnık jaralandy. Bul týraly Anadoly aqparat agenttigi habarlady. 

Túrkııanyń ishki ister mınıstri Alı Ierlıkaıanyń aıtýynsha, Nurdaǵy aýdany Kartal Koıý qalasynda polıtsııa Bas basqarmasynyń áýe flotynyń tikushaǵy apatqa ushyraǵan.

- EM 708 nómirli tikushaq Hataı áýejaıynan Gazıantep áýejaıyna ushyp bara jatqan, sońǵy ret ekıpaj jergilikti ýaqyt boıynsha 22.49-da baılanysqa shyqqan, - dep habarlady vedomstvo basshysy.

Oqıǵa ornyna dereý Ulttyq medıtsınalyq qutqarý qyzmeti (UMKE), qutqarýshylar, jandarmerııa qyzmetkerleri jáne Túrkııanyń Apattarmen kúres basqarmasynyń (AFAD) toptary jiberildi. Jaralanǵan polıtseı aýrýhanaǵa jatqyzyldy.