Túrkııanyń medıtsınalyq týrızm salasyndaǵy tabysy artyp keledi

ASTANA. KAZINFORM — 2024 jyly Túrkııaǵa medıtsınalyq qyzmet alý maqsatynda 1,5 mıllıon medıtsınalyq týrıst kelgen, dep habarlaıdy Kazinform agenttiginiń menshikti tilshisi. 

Túrkııa Saýda mınıstrligi jarııalaǵan esepke sáıkes, ótken jyly eldiń ekonomıkasyna medıtsınalyq týrızm salasynan 3 mıllıard dollar tabys túsken. Bul derekter sektordyń turaqty ósimin jáne Túrkııanyń joǵary sapaly ári qoljetimdi medıtsınalyq qyzmetter usynatyn álemdegi jetekshi baǵyttardyń biri retinde tanylýyn rastaıdy.

Mınıstrliktiń málimdeýinshe, 2012 jyldan 2024 jylǵa deıin Túrkııaǵa emdelý maqsatynda keletin sheteldik patsıentterdiń sany 6 ese artqan. Osy kezeńde medıtsınalyq qyzmetterdiń eksporty 4 esege ósken. Bul kórsetkishter medıtsınalyq ınfraqurylymnyń, halyqaralyq yntymaqtastyqtyń jáne usynylatyn qyzmetterdiń sapasynyń edáýir jaqsarǵanyn ańǵartady.

Eń kóp suranysqa ıe baǵyttar — plastıkalyq hırýrgııa, stomatologııa, oftalmologııa, ortopedııa, onkologııalyq aýrýlardy emdeý, sondaı-aq reprodýktıvti densaýlyqqa qatysty protsedýralar. Túrkııa tek Taıaý Shyǵys pen Eýropa elderinen emes, AQSh, TMD, Azııa jáne Afrıka elderinen de patsıentterdi tartyp jatyr.

Mamandardyń aıtýynsha, tabystyń negizgi faktorlary — zamanaýı klınıkalar, bilikti mamandardyń bolýy, az ýaqyt kútý merzimi jáne básekege qabiletti baǵa. Sonymen qatar, Túrkııa bul salany zańnamalyq jáne logıstıkalyq turǵyda qoldap, sheteldik patsıentterge qolaıly jaǵdaı jasap keledi.

Eldiń Saýda mınıstrligi medıtsınalyq týrızmdi qyzmet eksportynyń strategııalyq baǵyty retinde qarastyryp, aldaǵy jyldary bul salany memleket tarapynan belsendi qoldaý jalǵasatynyn atap ótti.

Buǵan deıin Túrkııada jańa týǵan nárestelerdiń jansaqtaý bólimderindegi zań buzýǵa baılanysty týyndaǵan daýly oqıǵadan keıin jekemenshik densaýlyq saqtaý sektoryna aýqymdy reformalar daıyndalyp jatqany habarlanǵan bolatyn.

Aıta ketelik búgin Túrkııanyń birneshe qalasynda jerasty dúmpýi tirkelgen edi.