Túrkııanyń Kojaelı qalasynda túrki álemi jastarynyń kezdesýi ótip jatyr
ASTANA. KAZINFORM – 9–11 qazan aralyǵynda Kojaelı qalasynda «Túrki áleminiń jastary» atty kezdesý ótip jatyr. Oǵan ártúrli elder men óńirlerden 500-ge jýyq jas qatysýda. Bul týraly Kazinform agenttiginiń Ankaradaǵy menshikti tilshisi habarlady.
Іs-sharany Túrkııanyń bıleýshi Ádilet jáne damý partııasy Kojaelı mýnıtsıpalıtetiniń qoldaýymen uıymdastyrdy. «Ortaq mura – birtutas júrek» uranymen ótip jatqan kezdesýge Túrki memleketteri uıymyna múshe elder men baqylaýshy memleketterdiń ókilderi, túrli elderdegi túrki qaýymdastyqtarynyń músheleri, sondaı-aq Túrkııanyń barlyq provıntsııasynan kelgen jastar qatysýda.
Úsh kúndik baǵdarlama aıasynda túrki áleminiń bolashaǵy, jastar yntymaqtastyǵy, dıplomatııa, ortaq tarıhı jady jáne tsıfrlyq ortadaǵy ózara is-qımyldy damytý máseleleri boıynsha pikirtalastar ótýde. Qatysýshylar mádenı jáne qoǵamdyq is-sharalarǵa, kontsertter men ekskýrsııalarǵa da qatysady.
Túrkııanyń Ádilet jáne damý partııasy tóraǵasynyń orynbasary, túrki memleketterimen baılanys jónindegi bólimniń jetekshisi Kúrshat Zorlý túrki álemindegi yntymaqtastyqty odan ári damytýda jastardyń mańyzdy ról atqaratynyn atap ótti. Onyń aıtýynsha, Túrki memleketteri uıymyna múshe elderde 15 pen 24 jas aralyǵyndaǵy jastardyń sany shamamen 26 mıllıonǵa jetedi. Bul bilikti mamandar daıarlaýǵa, jumyspen qamtýdy damytýǵa jáne memleketter arasyndaǵy almasýdy keńeıtýge zor múmkindik beredi.
Kúrshat Zorlý Túrkııa osyndaı kezdesýlerdi turaqty túrde ótkizýdi, olardyń aýqymyn birtindep keńeıtip, myńdaǵan jasty tartýdy josparlap otyrǵanyn da aıtty. Onyń sózinshe, áleýmettik jeliler men tsıfrlyq saladaǵy ózara is-qımylǵa, sondaı-aq jastardy Qytaı men Eýropa arasyndaǵy kólik jáne energetıkalyq dálizderdi damytýǵa qatysýǵa daıarlaýǵa erekshe kóńil bólinedi.
Kezdesý túrki memleketteri jastary arasyndaǵy baılanysty nyǵaıtyp, tarıhı jáne mádenı mura negizinde bolashaqqa qatysty ortaq kózqaras qalyptastyrýǵa yqpal etedi dep kútilýde.
Buǵan deıin Túrkııada Túrkologııa boıynsha VIII dástúrli jazǵy mektep jumysyn bastaǵanyn jazǵan edik.
