Túrkııanyń Qorǵanys mınıstrligi Grýzııadaǵy ushaq apatynan 20 áskerı qyzmetshiniń qaza tapqanyn rastady

ASTANA. KAZINFORM — Túrkııanyń Ulttyq qorǵanys mınıstrligi Grýzııada C-130 áskerı-kólik ushaǵy apatynan 20 áskerı qyzmetshiniń qaza tapqanyn málimdedi, dep habarlaıdy Kazinform. 

Mınıstrlik qaza tapqandardyń tizimin H áleýmettik jelisinde jarııalady.

— 11 qarashada Grýzııa-Ázerbaıjan shekarasynda S-130 áskerı-kólik ushaǵynyń apatqa ushyraýy saldarynan onyń bortynda bolǵan 20 áskerı qyzmetshimiz qaza tapty. Tańǵy saǵat 6:30–da Grýzııa bıligimen úılestire otyryp, bizdiń ushaq apatqa ushyraǵan jerde izdeý-qutqarý jumystary jáne tergeý amaldary bastaldy, — delingen málimdemede.

Eske sala ketsek, 11 qarashada Túrkııanyń C-130 ushaǵy Gıandja qalasynyń áýejaıynan ushyp shyǵyp, Grýzııanyń Sıgnagı mýnıtsıpalıteti aýmaǵynda qulaǵan.  Ushaq Grýzııa shekarasynan ótkennen keıin birneshe mınýttan soń, shekaradan shamamen 5 shaqyrym jerde radarlardan joǵalyp ketken. Grýzııanyń áýe navıgatsııasy qyzmetiniń málimetinshe, ushaq apat aldynda dabyl belgisin bermegen.

Keıin Grýzııa men Ázerbaıjan shekarasynda apatqa ushyraǵan túrkııalyq áskerı-kólik ushaǵynyń qaldyqtary tabylǵany habarlandy.