Túrkııanyń kólik mınıstri jyldamdyqty asyrǵany úshin aıyppul tóledi
ASTANA. KAZINFORM — Túrkııanyń kólik mınıstri Abdýlqadır Ýraloglý Ankara-Nıgde tas jolynda saǵatyna 224 shaqyrym jyldamdyqpen júrdi ári onyń vıdeosyn áleýmettik jelidegi paraqshasynda jarııalap, ereje buzǵany úshin aıyppul tóledi, dep habarlaıdy Haberer.
Ol áýeli áleýmettik jelidegi paraqshasynda qatty jyldamdyqpen kele jatqan vıdeosyn jarııalap, onyń astyna «Sharshaǵan kezde Prezıdentimizden shabyt alyp, jetkilikti jumys jasamadyq dep, jolymyzdy jalǵastyramyz» dep jazdy.
Alaıda, kólik mınıstriniń memlekettik ánuran áýenimen jyldamdyǵyn saǵatyna 224 shaqyrymǵa jetkizýi áleýmettik jelide úlken shý týdyrdy, sebebi túrik tas joldarynda ruqsat etilgen maksımaldy jyldamdyq — saǵatyna 140 shaqyrym.
Paıdalanýshylar jyldamdyqty buzǵany úshin mınıstrge qatań eskertý jasady.
Osydan keıin Ýraloglý taǵy bir jazba jarııalap, onda resmı túrde aıyppul tólegenin jazǵan.
— Ankara-Nıgde jolynyń sońǵy jaǵdaıyn kórý úshin rólge ózim otyrdym. Sol sátte onsha mán bermeı, az ýaqytqa jyldamdyqty arttyrdym. Vıdeomen bólisip, ózimdi ózim áshkereledim. Jyldamdyq erejelerin saqtaý bárimizge mindetti. Bizdiń jol qyzmeti tarapynan qajetti jazalaý sharasy qoldanyldy. Endi halyqqa budan bylaı muqııat bolatynymdy habarlaımyn, — dep jazdy mınıstr.
Eske sala keteıik, Túrkııada jolaýshylar avtobýsy aýdarylyp, 3 adam qaza tapty.