Túrkııanyń «Qyzyl sherbet» serıalynyń juldyzy ustaldy

ASTANA.KAZINFORM — Ystanbulda esirtkiniń zańsyz aınalymyna qatysty aýqymdy tergeý jalǵasyp jatyr, dep habarlaıdy Kazinform agenttiginiń menshikti tilshisi.

Túrkııada shoý-bıznes ókilderine qatysy bar esirtkige baılanysty rezonansty tergeý qaıtadan qarqyn ala bastady. Ystanbul prokýratýrasy kezekti arnaıy operatsııalar júrgizip, nátıjesinde tanymal ártister men medıa tulǵalardy qosa alǵanda, 27 adamdy ustady.

Ustalǵandar arasynda reıtıngi joǵary «Qyzyl sherbet» (túrikshe: Kızılcık Şerbeti) serıalynda Fatıh rólin somdaǵan akter Doǵýkan Gıýngór bar. Sondaı-aq tergeý nysanasyna Hadıse men Ashkyn Nýr Iengı syndy túrik estradasynyń juldyzdarymen jumys istegen menedjer Halýk Shentúrk te ilikken. Kúdiktiler tiziminde ánshi Alııa Shahınler men áleýmettik jelilerde tanymal Djeıda Ersoı da bar.

Ustalǵandardyń barlyǵy Sot-medıtsınalyq saraptama ınstıtýtyna jetkizilip, toksıkologııalyq zertteýler júrgizý úshin qan men shash úlgileri alynǵan. Budan keıin olar protsessýaldyq áreketterdi jalǵastyrý úshin qaıtadan polıtsııa basqarmasyna jiberildi.

Prokýratýra málimetinshe, tergeý 8 qazannan beri júrgizilip keledi jáne birneshe arnaıy operatsııany qamtıdy. Bul is aıasynda Túrkııa jurtshylyǵyna tanymal mýzykant, menedjer, kásipkerler jáne ózge de tulǵalardan jaýap alynyp, bıologııalyq úlgiler tapsyrylǵan.

Tergeý jalǵasyp jatyr. Quqyq qorǵaý organdary bul tek zań aıasyndaǵy tekserý ekenin atap ótip, túpkilikti qorytyndy saraptamalar men sot rásimderi aıaqtalǵannan keıin ǵana jasalatynyn málimdedi.

Buǵan deıin Ystanbulda shoý-bıznes ókilderiniń esirtki qoldanýy múmkin degen kúdikke baılanysty polıtsııa men jandarmerııanyń aýqymdy arnaıy operatsııasy ótkenin jazǵan edik.