Túrkııanyń ǵylymı ázirlemeleri Qazaqstannyń agrosektoryna úlgi bola ma
ASTANA. KAZINFORM — Aýyl sharýashylyǵy mınıstrliginiń delegatsııasy Túrkııanyń agrarlyq sektordy tsıfrlandyrý, aýyl sharýashylyǵy tehnıkasyn synaqtan ótkizý jáne ǵylymı ázirlemelerdi óndiriske engizý baǵytyndaǵy tájirıbesin zerdeledi.
Mańyzdy shara Azyq-túlik qaýipsizdigi jónindegi Islam uıymynyń qoldaýymen uıymdastyryldy.
Mınıstrlik ókilderi Ankara jáne Konıa qalalaryndaǵy beıindi mekemeler men ónerkásiptik kásiporyndarǵa baryp, Túrkııanyń agroónerkásiptik keshendi tehnologııalyq turǵydan damytý tásilderimen tanysty.
Ankara qalasynda delegatsııa músheleri aýyl sharýashylyǵynda qoldanylatyn tsıfrlyq quraldardyń múmkindikterimen tanysty.
Túrkııanyń Aýyl jáne orman sharýashylyǵy mınıstrliginiń ókilderi vedomstvonyń aqparattyq júıeleri týraly jan-jaqty baıandap, salany tsıfrlyq transformatsııalaýdyń negizgi baǵyttaryna aıryqsha nazar aýdardy.
Al, Konıa qalasynda ǵylymı zertteýlerge jáne zamanaýı agrotehnologııalardy óndiriske engizýge basymdyq berildi. Topyraqtaný, sý resýrstary jáne shóleıttenýge qarsy kúres jónindegi ǵylymı-zertteý ınstıtýtynda zertteý jumystaryn uıymdastyrý tásilderi men olardyń nátıjelerin aýyl sharýashylyǵy óndirisinde is júzinde qoldaný tájirıbesine basa kóńil bólindi.
Sonymen qatar delegatsııa aýyl sharýashylyǵy tehnıkasy men ónerkásiptik qozǵaltqyshtar shyǵaratyn kásiporyndardyń óndiristik úderisterimen tanysty. Qazaqstandyq tarapqa óndiristi uıymdastyrý erekshelikteri jáne túrik kompanııalarynyń mashına jasaý salasyndaǵy tájirıbesi týraly aıtyldy.
Atalǵan baǵyttar boıynsha ózara is-qımyldy damytý kásibı bilim men tájirıbe almasýǵa, zamanaýı tehnologııalardy engizýge jáne aýyl sharýashylyǵy salasyndaǵy Qazaqstan men Túrkııa arasyndaǵy yntymaqtastyqty nyǵaıtýǵa yqpal etedi.
