Túrkııanyń Gazı ýnıversıteti Qazaqstanda alǵashqy stýdentterin qabyldaı bastady
ASTANA. KAZINFORM — Ózbekáli Jánibekov atyndaǵy Ońtústik Qazaqstan pedagogıkalyq ýnıversıtetiniń janynan ashylǵan Túrkııanyń Gazı ýnıversıtetiniń Qazaqstandaǵy fılıaly bıyl alǵashqy talapkerlerin qabyldady.
Ǵylym jáne joǵary bilim mınıstrliginiń baspasóz qyzmeti habarlaǵandaı, qazir fılıalda stýdentterdi qabyldaý, halyqaralyq standarttarǵa sáıkes bilim berý úshin qajetti ınfraqurylym men materıaldyq-tehnıkalyq bazany qalyptastyrý, oqý protsesin uıymdastyrý, oqý josparlaryn ázirleý jáne fılıal qyzmetin retteıtin normatıvtik-quqyqtyq talaptardy qamtamasyz etý boıynsha jumystar júrgizilip jatyr.
2026-2027 oqý jylyna QR Ǵylym jáne joǵary bilim mınıstrligi fılıalǵa 100 memlekettik bilim berý grantyn bóldi.
— Talapkerlerdi irikteý halyqaralyq talaptarǵa sáıkes eki kezeń boıynsha uıymdastyryldy. Birinshi kezeńde úmitkerlerdiń teorııalyq daıyndyǵy men akademııalyq bilim deńgeıi baǵalandy. Joǵary nátıje kórsetken talapkerler ekinshi kezeń — suhbattasý emtıhanyna qatysý múmkindigine ıe boldy. Іrikteý nátıjesinde qazirgi tańda fılıalǵa bólingen memlekettik bilim berý granttarynyń 77 ıegeri anyqtaldy. Gazı ýnıversıtetiniń Qazaqstandaǵy fılıalyna qujat tapsyrǵan alǵashqy talapker — Sabına Dıhan, — delingen mınıstrlik taratqan aqparatta.
Fılıaldyń ashylýy — Qazaqstan men Túrkııa arasyndaǵy joǵary bilim berý salasyndaǵy yntymaqtastyqty jańa deńgeıge kóterýge baǵyttalǵan strategııalyq joba. Aldaǵy ýaqytta fılıal aıasynda birlesken ǵylymı zertteýler, akademııalyq utqyrlyq baǵdarlamalary, tájirıbe almasý jáne qos dıplomdy bilim berý jobalaryn iske asyrý josparlanǵan. Bul bastamalar Qazaqstandaǵy pedagogıkalyq bilim berýdiń sapasyn arttyrýǵa jáne halyqaralyq tájirıbeni oqý protsesine engizýge jańa múmkindikter ashady.
Osyǵan deıin grantqa ilige almaǵan talapkerlerge qandaı múmkindik bar ekenin jazǵan edik.
