Túrkııa jaǵalaýynda ekskýrsııalyq keme órtenip, 115 adam teńizge sekirdi
ASTANA. KAZINFORM — Túrkııanyń Fethıe qalasynda ekskýrsııalyq kemeden órt shyqty. Barlyq jolaýshy qutqarý keýdeshelerin kıip, teńizge sekirýge májbúr boldy, dep habarlaıdy Kazinform agenttiginiń Ankaradaǵy menshikti tilshisi.
Oqıǵa Katrandjy shyǵanaǵy mańynda bolǵan. «Toys Boat» kemesindegi órt asúıden bastalyp, keıin jalyn kemege tez taraǵan.
Barlyǵy 115 jolaýshy, onyń ishinde ekıpaj músheleri men balalar, kemeni tastap, sýǵa sekirgen.
Oqıǵa ornyna jaǵalaý kúzeti, teńiz qaýipsizdigi qyzmetteri men medıtsınalyq brıgadalar jumyldyryldy. Qutqarý jumystaryna mańaıda bolǵan basqa da júzý quraldary qatysty.
Órtten keme qatty zaqymdanyp, keıin bata bastaǵan. Órt sóndirilgennen keıin zaqymdanǵan kemeni sýdan kóterip, jaǵaǵa shyǵarý josparlanyp otyr.
Aldyn ala málimet boıynsha, qaza tapqandar men zardap shekkender joq. Órttiń shyǵý sebebin mamandar anyqtap jatyr.
Buǵan deıin Túrkııanyń Antalıa provıntsııasy Demre aýdanynyń jaǵalaýynda toqtaý týraly talapqa baǵynbaı, qashýǵa áreket jasaǵan qaıyqtyń jaǵalaý kúzeti katerimen soqtyǵysýy saldarynan 14 zańsyz mıgrant qaza tapqany habarlanǵan edi.
Sonymen qatar Túrkııada 18 jastaǵy Qazaqstan azamaty kóz jumǵany habarlandy.
