Túrkııanyń eń baı kásipkeri medıtsınalyq marıhýana týraly zań jobasyna qarsy shyqty

ASTANA. KAZINFORM — Túrkııanyń eń baı kásipkeri Mýrad Úlker elde medıtsınalyq maqsattaǵy qarasorany zańdastyrýǵa qarsy pikir bildirdi, dep habarlaıdy Kazinform tilshisi.

Sońǵy aılarda Túrkııa Parlamenti birqatar aýrýdy emdeýge arnalǵan medıtsınalyq qarasorany zańdastyrý máselesin belsendi túrde talqylap keledi. Zań jobasyn qoldaýshylar bul naýqastardyń ómir sapasyn jaqsartýǵa jáne shetelden ákelinetin dári-dármekterge táýeldilikti azaıtýǵa múmkindik beredi dep esepteıdi. Alaıda qarsy tarap bul bastamanyń qaýipteri bar ekenin aıtyp, asa qatań baqylaý qajettigin alǵa tartady.

Yıldız Holding dırektorlar keńesiniń múshesi Mýrad Úlker elde medıtsınalyq qarasoranyń dárihanalarda satylýyna ruqsat berýge qatysty zań jobasyn synǵa aldy. Ol mundaı sheshim jastar arasynda nashaqorlyqtyń artýyna, ólim-jitimniń kóbeıýine jáne jol-kólik oqıǵalarynyń jıileýine alyp kelýi múmkin ekenin eskertti. Onyń aıtýynsha, mundaı jaǵdaılar kannabıs zańdastyrylǵan Kanada men AQSh-ta baıqalǵan.

— Bul jaı ǵana zańnamalyq másele emes — bul qoǵamdyq densaýlyq pen moraldyq tańdaý máselesi. Biz Túrkııanyń bolashaǵyn qaýipke tige almaımyz, — dedi Úlker.

Kásipkerdiń pikirinshe, qazirgi tańda Túrkııada medıtsınalyq qarasorany óndirý, satý jáne tutyný protsesterin tıimdi baqylaýǵa arnalǵan tetikter jetkiliksiz. Ol bul zań jobasy qylmystyq toptarǵa jáne «qara naryqqa» jol ashýy múmkin dep qaýiptenedi.

Úlker depýtattardy bul bastamadan bas tartýǵa jáne ony eldiń uzaq merzimdi múddeleri turǵysynan qaıta qaraýǵa shaqyrdy. Ol halyqtyń, ásirese jastardyń densaýlyǵyna qatysty máseleler tek jaýapkershilikpen jáne ǵylymı negizde qarastyrylýy tıis ekenin aıtty.

Buǵan deıin Túrkııanyń medıtsınalyq týrızm salasyndaǵy tabysy artyp kele jatqanyn jazǵan edik.