Túrkııanyń eki áskerı bazasy Sırııada ornalastyrylady
ASTANA.KAZINFORM - Túrkııa Sırııada eki áskerı baza quryp, Sırııa armııasyn oqytýǵa kómektespekshi, dep habarlaıdy Kazinform tilshisi.

Irannyń Mehr News Agency basylymynyń habarlaýynsha, bul bazalar Túrkııa men Sırııa arasyndaǵy jańa qorǵanys kelisimi aıasynda qurylady. Bul degenimiz Túrkııaǵa qaýip tóngen jaǵdaıda Sırııanyń aýmaqtyq tutastyǵy men qaýipsizdigin qorǵaýda kómek kórsetýge múmkindik beredi.
Kelisimniń mańyzdy tustarynyń biri – túrik mamandary sırııalyq sarbazdar men áskerı ushqyshtardy oqytady. Túrkııa sırııalyq áskerılerdi oqytady jáne Sırııa Áskerı-áýe kúshteriniń qalyptasýyn aıaqtaý úshin tolyq qoldaý kórsetedi.
Sırııadaǵy túrik áskerı bazalary 50 F-16 joıǵysh ushaǵymen jáne ushqyshsyz apparattarmen jabdyqtalady, bul sarapshylardyń pikirinshe, arab eliniń qorǵanys qabiletin aıtarlyqtaı kúsheıtip, qaýipsizdik salasyndaǵy táýelsizdigin arttyrady.
Túrkııanyń áskerı tehnıkasy men avıatsııasy Sırııa armııasy mundaı qaýipterge tolyqtaı qarsy turyp, toıtarys berýge daıyn bolǵanǵa deıin, eldiń egemendigin buzýǵa baǵyttalǵan yqtımal shabýyldardan qorǵaý úshin qyzmet etedi dep atap ótildi.
Sonymen qatar, baqylaýshylar mundaı áskerı nysandardyń qurylýy jáne qorǵanys salasyndaǵy yntymaqtastyq Túrkııa men Sırııa arasyndaǵy strategııalyq seriktestiktiń nyǵaıýyn kórsetedi, bul búkil aımaq úshin, sonyń ishinde Taıaý Shyǵystaǵy kúshter úshin mańyzdy.
Buǵan deıin Túrkııa men Sırııa arasyndaǵy ekonomıkalyq baılanystardy qalpyna keltirýge baǵyttalǵan mańyzdy qadamdardy qamtıtyn saýda qarym-qatynastarynyń jol kartasyn júzege asyrýǵa kiriskenin jazǵan bolatynbyz.