Túrkııanyń burynǵy Syrtqy ister mınıstri EQYU Bas hatshysy bolyp saılandy

ASTANA.KAZINFORM - Ferıdýn Sınırlıoǵly EQYU-ǵa múshe 57 eldiń biraýyzdan qoldaýymen uıymnyń bas hatshysy bolyp saılandy, dep habarlaıdy Anadoly.

2024 jylǵy 5-6 jeltoqsanda Maltada ótken EQYU Syrtqy ister mınıstrleri keńesiniń 31-shi otyrysynda Ferıdýn Sınırlıoglý uıymnyń Bas hatshysy qyzmetine taǵaıyndaldy.

Bas hatshyny EQYU músheleri úsh jyldyq merzimge saılaıdy.

Sınırlıoǵly uıymnyń negizin qalaǵan 1975 jylǵy Helsınkı qorytyndy aktiniń 50 jyldyq tarıhynda EQYU Bas hatshysy qyzmetin atqarǵan alǵashqy túrik azamaty.

Ankara Sınırlıoǵlynyń jańa mindetterin sátti atqaratynyna jáne EQYU fýnktsııalaryn tıimdi oryndaýǵa úles qosatynyna ýáde berdi.

Ferıdýn Sınırlıoǵlynyń halyqaralyq qatynastar men dıplomatııa salasynda 40 jyldan astam tájirıbesi bar.

Ol 2015 jyly qurylǵan ýaqytsha úkimette Syrtqy ister mınıstri, 2015-2016 jáne 2009-2015 jyldary Syrtqy ister mınıstriniń orynbasary qyzmetin atqarǵan. 2016-2023 jyldar aralyǵynda Túrkııanyń BUU janyndaǵy turaqty ókili qyzmetin atqardy. 2023 jyly BUU Bas hatshysy ony Aýǵanstandy táýelsiz baǵalaý jónindegi arnaıy úılestirýshi etip taǵaıyndady.