Túrkııanyń Bolý taý-shańǵysy kýrortynda qaza tapqandar sany 66-ǵa jetti
ASTANA. KAZINFORM — Túrkııanyń Bolý provıntsııasyndaǵy Kartalkaıa taý-shańǵysy kýrortynda bolǵan órtten qaza tapqandar sany 66-ǵa, jaralanǵandar sany 51-ge jetti, dep habarlaıdy Kazinform menshikti tilshisi.
Órt ǵımaratty tez sharpyp, qonaqtar men qyzmetkerlerdiń evakýatsııalanýyn qıyndatqan. Qonaq úı eńis jerde ornalasqandyqtan, bir jaǵynan ǵana shyǵý múmkin boldy, bul adamdardyń óz betimen qashý múmkindigin shektep, órt sóndirýshilerdiń ár taraptan sóndirýge jáne aýqymdy qutqarý jumystaryn júrgizýine jol bermedi.
Kýágerlerdiń aıtýynsha, olardyń kóbi naqty qaýipsizdik júıesi men ǵımarattan shyǵýdy durys uıymdastyrýdyń joqtyǵynan qalyp qoıǵan. Zardap shekkender, onyń ishinde jergilikti turǵyndar men sheteldik týrıster ártúrli aýyrlyqtaǵy jaraqattarmen, sonyń ishinde kúıik jáne kómirqyshqyl gazymen ýlanyp aýrýhanaǵa jetkizildi.
Túrkııa Іshki ister mınıstri Alı Ierlıkaıa qaza bolǵandardyń otbasylaryna kóńil aıtyp, órttiń saldaryn joıý boıynsha júrgizilip jatqan jumystar týraly habarlady.
— Birinshiden, qaza bolǵandardyń otbasyna kóńil aıtamyn. Aýrýhanada jatqandardyń tezirek saýyǵyp ketýin tileımin. Órt bolǵan qonaq úı 12 qabattan turady. Órt kezinde 238 qonaq tirkelgen. Alǵashqy qońyraý saǵat 03:27–de tústi. Osydan keıin birden barlyq tótenshe jaǵdaılar qyzmeti órtti sóndirýge atsalysty. Saǵat 04:15–te órt sóndirildi. Órtti sóndirýge barlyǵy 156 birlik tehnıka men túrli qyzmetterden 428 qyzmetker jumyldyryldy. Oqıǵa ornynda barlyq ýákiletti organdardyń ókilderi júr, dep habarlady ІІM basshysy BAQ ókilderine.
Óz kezeginde Túrkııanyń densaýlyq saqtaý mınıstri Kemal Memıshoglý qaıǵyly oqıǵa saldarynan 66 adam qaza taýyp, taǵy 51 adam jaraqat alǵanyn, olardyń biriniń jaǵdaıy aýyr ekenin habarlady. Bul rette 12 adamǵa qajetti medıtsınalyq kómek kórsetilip, úılerine shyǵaryldy.
Qonaq úıdiń órt qaýipsizdigi týraly resmı sertıfıkaty bar ekendigi baqylaýshy organdarǵa suraq týǵyzdy. Belgili bolǵandaı, attestatsııa kezinde órt ınspektsııasy qonaq úıdi barlyq standarttarǵa sáıkes dep tanyǵan. Alaıda sarapshylar on eki qabatty ǵımaratta mundaı saldarǵa ákelýi múmkin buzýshylyqtardy anyqtady.
Al, órt qaýipsizdiginiń qarapaıym sharttary joq bul qonaq úıde bir kún turý quny eki adamǵa 30 myń túrik lırasyn (shamamen 455 myń teńge) quraıdy.
Bılik órttiń shyǵý sebepterin anyqtap, shyǵyndy baǵalaıtyn arnaıy komıssııa qurylatynyn habarlady.
Osyǵan deıin Túrkııada ishimdikten ýlanyp qaza tapqan ózbekstandyqtar sany 14-ke jetkeni málim boldy.