Túrkııanyń avıatsııa salasy rekordtyq ósim kórsetti

ASTANA. KAZINFORM - Ótken jyldyń sońyna taman Túrkııanyń azamattyq avıatsııasy rekordtyq ósim kórsetkishin tirkedi, dep habarlaıdy Kazinfrom menshikti tilshisi.

Kólik jáne ınfraqurylym mınıstri Abdýlkadır Ýraloglýnyń málimetinshe, eldegi jolaýshylar jáne júk tasymaldaıtyn áýe kemeleriniń jalpy sany 800-ge jetken. Sonymen qatar ushqyshtar sany ótken jylmen salystyrǵanda 10 paıyzǵa artyp, 17 910 adamdy qurady.

Azamattyq avıatsııa bas basqarmasynyń derekterine súıensek, sońǵy 23 jyl ishinde sala barlyq baǵyt boıynsha turaqty ósim kórsetip keledi. Atap aıtqanda, áýe parkiniń keńeıýi, jolaýshylar men júk syıymdylyǵynyń artýy, ishki jáne halyqaralyq baǵyttar jelisiniń damýy, sondaı-aq lıtsenzııalanǵan avıatsııa mamandary sanynyń kóbeıýi baıqalady.

Mınıstr Túrkııanyń strategııalyq geografııalyq ornalasýyna da aıryqsha toqtaldy.

Onyń aıtýynsha, el tórt saǵattyq ushý aımaǵynda shamamen 1,5 mıllıard halqy bar 67 memleketti qamtıtyn óńirdiń dál ortasynda ornalasqan.

Osy artyqshylyqty Túrkııa úkimeti der kezinde ári durys baǵalap, avıatsııa salasyn memlekettik saıasattyń basym baǵyttarynyń birine aınaldyra bildi.

Bılik ókilderiniń pikirinshe, salanyń qarqyndy damýy Túrkııanyń jahandyq avıatsııa naryǵyndaǵy pozıtsııasyn nyǵaıtyp qana qoımaı, ekonomıkalyq ósimge, halyqaralyq saýda men týrızmniń keńeıýine de serpin beredi.

Osyǵan deıin Túrkııa áýe tasymaly boıynsha tarıhı rekordty jańartqany týraly jazdyq.