Túrkııanyń Antalıa qalasynda reseılik áıeldi qaıyq basyp qalyp, kóz jumdy
ASTANA. KAZINFORM – Reseıdiń 42 jastaǵy azamatshasy Lınarııa Mýzıpova qaıyq astynda qalyp kóz jumdy, dep habarlaıdy Kazinform agenttiginiń menshikti tilshisi.
Qaıǵyly oqıǵa Kemer kýrorttyq qalasyndaǵy Chamıýva jaǵajaıynyń janyndaǵy boldy. Parasseılıng qyzmetin (kater artynan parashıýtpen ushý) kórsetetin kompanııaǵa tıesili kater qalqymaly belgi ornatylǵan jerden shyǵyp ketip, teńizde júzip júrgen áıelmen soqtyǵysqan.
Oqıǵa kýágerleri — qutqarýshylar men sý sporty kompanııasynyń qyzmetkerleri oqıǵa týraly dereý tótenshe jaǵdaılar qyzmetine habarlaǵan. Oqıǵa ornyna dárigerler, jandarmerııa qyzmetkerleri jáne Kemer jaǵalaý kúzeti keldi. Alaıda kelgen dárigerler onyń qaıtys bolǵanyn anyqtady.
Áıeldiń denesi Antalıa sot-medıtsına ınstıtýtynyń máıithanasyna jetkizildi. Qaıyq kapıtany men sý sporty kompanııasynyń ókili jaýap alý úshin ustaldy. Chamıýva aımaǵyndaǵy barlyq sý attraktsıondarynyń jumysy ýaqytsha toqtatyldy. Qaıǵyly oqıǵanyń mán-jaıyn anyqtaý amaldary júrgizilip jatyr.
Buǵan deıin Bosfor arqyly ótken qurlyqaralyq júzý kezinde reseılik sportshy Nıkolaı Svechnıkovtyń joǵalýynan keıin, Ystanbulda taǵy bir sheteldik azamat — Belarýs sporttyq yntymaqtastyq qorynyń halyqaralyq bólim basshysy Anatolıı Kotov jumbaq jaǵdaıda iz-túzsiz ketkenin jazǵan bolatynbyz.