Túrkııanyń alǵashqy spýtnıgi orbıtaǵa sátti shyǵaryldy

ASTANA. KAZINFORM – Transporter-12 mıssııasy aıasynda SpaceX kompanııasynyń Falcon 9 zymyrany Fergani Space FGN-100-d1 túrik kompanııasynyń alǵashqy jer serigin orbıtaǵa sátti shyǵardy, dep habarlaıdy Kazinform agenttiginiń menshikti tilshisi.

Ushyrý operatsııasy AQSh-taǵy Vandenberg áýe kúshteriniń bazasynda ótti jáne SpaceX kompanııasynyń akkaýnttarynda tikeleı efırden kórsetildi.

Transporter-12 mıssııasy kezinde Falcon 9 zymyrany ǵaryshqa 131 paıdaly júkti ushyrdy. Olardyń arasynda kýbosattar, mıkrospýtnıkter jáne orbıtalyq kólikter bar. FGN-100-d1 spýtnıginen basqa ǵaryshtyq tehnologııalardy belsendi damytatyn taǵy bir túrik kompanııasy Plan-S spýtnıkteri de orbıtaǵa shyǵaryldy.

Fergani Space spýtnıgine arnalǵan sýteginiń asqyn totyǵy negizindegi ǵarysh qozǵaltqyshynyń synaqtary ótken jyldyń mamyr aıynda sátti aıaqtalyp, bul mıssııaǵa daıyndyqtyń negizgi kezeńderiniń biri boldy. 

Fergani Space-tiń negizin qalaýshy, Baykar dırektorlar keńesiniń tóraǵasy Selchýk Baıraktar Túrkııanyń birinshi jer serigin orbıtaǵa sátti shyǵarǵanyn aıtty.

- Biz 2022 jyly iske qosqan Fergani Space kásiporny 106 adamnan turatyn úlken otbasy retinde damýyn jalǵastyryp keledi. Búginde birinshi túrik jer serigin orbıtaǵa shyǵardyq. Bizdiń spýtnıkter pozıtsııalaý jáne baılanys maqsatynda tómen orbıtalyq shoqjuldyz retinde qyzmet etedi. Bul jobany óz kúshimizben júzege asyrdyq. Osy kezde bizdiń jer serigimiz qajetti bıiktikke jetip, alǵashqy manevrlerin aıaqtady, - dedi Selchýk Baıraktar.

Mamandardyń pikirinshe, FGN-100-d1 spýtnıgi Fergani Space kompanııasynyń ǵaryshtyq tehnologııalar men navıgatsııalyq júıelerdi damytý jónindegi jahandyq mıssııasyndaǵy alǵashqy qadamy boldy. Bul ǵarysh jobasynyń sátti júzege asýy Túrkııanyń ǵaryshty ıgerýdegi róliniń artyp kele jatqanyn jáne onyń ulttyq spýtnıktik ınfraqurylymdy qurý ambıtsııalaryn tanytyp otyr.