Túrkııanyń Afrıkaǵa eksporty ulǵaıyp keledi

ASTANA. KAZINFORM – Túrkııanyń ózara yntymaqtastyqqa baǵyttalǵan strategııasyna sáıkes, Afrıka elderine eksporty senimdi túrde ósip keledi, dep habarlaıdy Kazinform agenttiginiń menshikti tilshisi.

Túrik eksportshylary assambleıasynyń málimetteri boıynsha, bıylǵy jyldyń qańtar-mamyr aralyǵynda Afrıka naryǵyna jetkizilimder $8,4 mlrd-ty qurady, bul 2024 jyldyń sáıkes merzimimen salystyrǵanda 8,3% kóp.

Bul ósim ótken jylǵy jetistiktiń jalǵasy boldy. Ol kezde Túrkııanyń Afrıkaǵa jalpy eksporty 1,7 %-ǵa artyp, 19,4 mıllıard dollarǵa jetken edi. Saýda aınalymynyń edáýir bóligi Marokko, Mysyr jáne Lıvııa elderiniń úlesinde.

2025 jyly Marokko Túrkııanyń Afrıkadaǵy negizgi saýda seriktesteriniń qataryna kirip, eksport kólemi 1,5 mıllıard dollardy qurady. Odan keıingi orynda Mysyr (1,3 mıllıard) jáne Lıvııa (1,1 mıllıard) tur.

Saýdadan bólek, Túrkııa qurlyqtaǵy ınfraqurylymdyq jáne ınvestıtsııalyq jobalarǵa da belsendi qatysyp keledi. Máselen, túrik merdigerleri Marokkoda 4,3 mıllıard dollar kóleminde qurylys jobalaryn júzege asyrdy. Sondaı-aq qorǵanys ónimderin eksporttaýǵa da aıryqsha kóńil bólip otyr. Іri túrik qorǵanys kompanııalary — Baykar, Aselsan, Tusaş jáne Nurol aımaqtaǵy belsendiligin kúsheıtip, drondar, brondy tehnıka jáne ózge de joǵary tehnologııalyq júıelerdi jetkizip jatyr.

Osyǵan deıin Túrkııa jarııalaǵan «win-win» strategııasyna tek ekonomıkalyq yntymaqtastyq qana emes, saıası jáne mádenıet baılanystardy nyǵaıtý, aýyl sharýashylyǵyn, densaýlyq saqtaý men bilim berýdi qoldaýǵa baǵyttalǵan ózara almasý baǵdarlamalary kiredi.

Eksporttyń ósýi men jobalardyń keńeıýi Túrkııanyń Afrıka elderi úshin jaı ǵana saýda seriktesi emes, strategııalyq odaqtas bolýǵa umtylyp otyrǵanyn dáleldeıdi. Osylaısha, berik ári ózara tıimdi yntymaqtastyq alańy qalyptasyp keledi.

Osyǵan deıin Túrkııanyń energetıkalyq qýattardyń ósimi boıynsha Eýropada kóshbasshy atanǵany týraly jazdyq.