Túrkııanyń Afrıkaǵa eksporty artyp keledi

ASTANA. KAZINFORM – Túrkııa eksporttaýshylar assambleıasynyń (TIM) málimetinshe, 2024 jyly eldiń Afrıkaǵa eksportynyń kólemi 1,7 paıyzǵa artyp, 19,4 mlrd dollardy quraǵan, dep habarlaıdy Kazinform agenttiginiń menshikti tilshisi.

Túrkııa Afrıkamen saýda-ekonomıkalyq qarym-qatynasty 2003 jyly belsendi túrde damyta bastady. Arnaıy baǵdarlama qabyldap, talaı birlesken jobany qolǵa aldy.

Osylaısha, Túrkııa Afrıkanyń 56 eline taýar eksporttady. Bul onyń jalpy eksportynyń 7,4 paıyzyn quraǵan.

Negizgi seriktes elder - Mysyr, Marokko jáne Lıvııa.

Mysyrǵa eksport 3,5 mlrd dollarǵa jetip, ótken jylmen salystyrǵanda 21,8 paıyzǵa artqan. Marokkoǵa eksport 3,1 mlrd dollardy, al Lıvııaǵa – 2,5 mlrd dollardy qurady.

Afrıkaǵa eksporttalǵan túrik ónimderi san alýan. Onyń ishinde birinshi oryndaǵy hımııa ónimderi 3,1 mlrd dollarǵa satyldy. Ekinshi orynda 2,5 mlrd dollar kórsetkishimen avtomobıl ónerkásibi, elektr energetıkasy men elektrondy ónimder tur.

Osyǵan deıin Túrkııa Sırııamen saýda qatynastaryn damytatyn jol kartasyn iske asyrýǵa kiriskeni týraly jazdyq.