Túrkııanyń Afrıkaǵa eksporty 13,3 mlrd dollarǵa deıin artty
ASTANA. KAZINFORM – Túrkııanyń Afrıkaǵa eksporty jeti aıda 12,6%-ǵa artyp, 13,3 mlrd dollarǵa jetti, dep habarlaıdy Kazinform agenttiginiń Ankaradaǵy menshikti tilshisi.
Túrkııanyń Afrıka elderine eksporty logıstıkalyq baılanystardyń keńeıýi men belsendi ekonomıkalyq dıplomatııa aıasynda ósýin jalǵastyrýda. Qańtar-shilde aralyǵynda jetkizilimder ótken jylmen salystyrǵanda 12,6%-ǵa ósip, 13,3 mlrd dollarǵa jetti. Shildede eksport 16,3%-ǵa artyp, 2,3 mlrd dollarǵa jetti.
Mysyr, Ońtústik Afrıka jáne Nıgerııaǵa jóneltilimder aıtarlyqtaı artqan. Mysyrǵa eksport jeti aılyq kezeńde 26,1%-ǵa artyp, 2,3 mlrd dollarǵa, Ońtústik Afrıkaǵa 31,3%-ǵa artyp, 479 mln dollarǵa, al Nıgerııaǵa 52,1%-ǵa artyp, 453,2 mln dollarǵa jetti. Shilde aıynda Lıvııaǵa jóneltilimder 22,4%-ǵa artyp, 289 mln dollardy qurady.
Túrkııanyń syrtqy ekonomıkalyq baılanystar keńesi (DEIK) janyndaǵy Túrkııa-Afrıka iskerlik qatynastar keńesiniń úılestirýshisi Osman Aksonyń málimdeýinshe, bul ósim saýda dıplomatııasynyń kópjyldyq nátıjelerin kórsetip otyr. Ol sondaı-aq ulttyq tasymaldaýshylardyń áýe qatynasyn keńeıtýi jáne teńiz degi konteınerlik baǵyttaryn damytý mańyzdy ról atqaratynyn atap ótti.
Eksporttyń negizgi qozǵaýshy kúshteri – mashına jasaý, elektronıka, avtomobılder, hımııa ónerkásibi, metallýrgııa, toqyma ónerkásibi, azyq-túlik ónimderi jáne qurylys materıaldary. Túrik kompanııalary sondaı-aq Afrıkadaǵy iri ınfraqurylymdyq jobalarǵa, sonyń ishinde joldar, porttar, áýejaılar jáne turǵyn úı qurylysyna qatysyp otyr.
Osyǵan deıin Ystanbul áýejaıy jolaýshy tasymaly boıynsha kósh bastaǵanyn habarladyq.
Túrkııanyń Eýrazııanyń jańa logıstıkasynda qandaı ról atqaratynyn myna materıaldan oqı alasyz.
