Túrkııanyń 26 ýnıversıteti «QS 2026» reıtıngi tizimine endi

ASTANA. KAZINFORM - Túrkııa Joǵary bilim keńesi (YÖK) álemniń 106 elinen 1500 ýnıversıtetti qamtıtyn «QS 2026» álem ýnıversıtetteri reıtınginiń tizimine 26 túrik ýnıversıtetiniń kirgenin jarııalady, dep habarlaıdy TRT aqparattyq agenttigi.

Bul reıtıngte Túrkııa 20-dan astam ýnıversıteti bar elder arasynda tórtinshi orynda tur. 

Túrkııanyń Taıaý Shyǵys tehnıkalyq ýnıversıteti 269-shy, Stambýl tehnıkalyq ýnıversıteti 298-shi orynda bolsa, álemniń eń úzdik 300 ýnıversıteti arasynda Koch ýnıversıteti 323-shi jáne Bosfor ýnıversıteti 371-shi orynǵa ıe bolyp, alǵashqy 400 JOO tizimine kirdi. Sabandjy ýnıversıteti 404-shi, Bılkent ýnıversıteti 415-shi orynda. Osylaısha 6 túrik ýnıversıteti álemniń úzdik 500 ýnıversıtetiniń qataryna endi.

Hadjettepe ýnıversıteti 571-shi, Stambýl ýnıversıteti 628-shi, Ankara ýnıversıteti 697-shi, Iyldyz tehnıkalyq ýnıversıteti 736-shy, Gazı ýnıversıteti 915-shi orynǵa ıe bolyp, reıtıngtegi alǵashqy 1000 ýnıversıtet tizimine endi.

«QS Türkiye esebine sáıkes, Taıaý Shyǵys tehnıkalyq ýnıversıteti, Bosfor jáne Stambýl tehnıkalyq ýnıversıteti „Jumys berýshi bedeli“ kórsetkishi boıynsha álemniń eń úzdik 100 ýnıversıtetiniń qatarynda. 

Túrkııa Joǵary bilim keńesiniń tóraǵasy professor Erol Ózvar «Bul jetistik kezdeısoq emes. Barlyǵymyz birge eńbek ettik. Budan da joǵary jetistikterge jetemiz. Reıtıngke engen jáne aıanbaı eńbek etken ýnıversıtetterimizdi quttyqtaımyn», — dedi.

Eske sala keteıik, buǵan deıin Qazaqstannyń úsh ýnıversıteti alǵash ret QS 2026 reıtıngi tizimine engeni týraly jazǵanbyz.