Túrkııany qosa alǵanda segiz memleket Tramptyń Gazadaǵy shabýyldy toqtatý josparyn qoldady
ASTANA. KAZINFORM – Túrkııany qosa alǵanda 8 memleket birlesken málimdeme jasap, onda AQSh prezıdenti Donald Tramptyń Gazaǵa shabýyldy toqtatýǵa degen shyn nıetine qoldaý bildirdi, dep habarlaıdy Anadoly.
Túrkııa, Iordanııa, Birikken Arab Ámirlikteri (BAÁ), Indonezııa, Pákistan, Saýd Arabııasy, Katar jáne Mysyrdyń Syrtqy ister mınıstrleri AQSh Prezıdenti Donald Tramptyń Gaza sektoryndaǵy qaqtyǵysty toqtatýǵa arnalǵan keshendi jospary jarııalanǵannan keıin birlesken jazbasha málimdeme jasady. Jospar 20 tarmaqtan turady.
Segiz memleket AQSh Prezıdenti Donald Tramptyń Gaza sektoryndaǵy qaqtyǵysty toqtatýǵa baǵyttalǵan kóshbasshylyǵy men shynaıy kúsh-jigerin joǵary baǵalap, onyń óńirde beıbitshilik ornatýǵa degen tabandylyǵyna senim bildirdi. Málimdemede atalǵan maqsattarǵa qol jetkizý jolynda AQSh-pen yntymaqtastyqtyń mańyzdylyǵy erekshe atap ótildi.
Mınıstrler beıbitshilik, qaýipsizdik jáne turaqtylyqty qamtamasyz etetin kelisimdi jasaý men iske asyrý úshin AQSh jáne basqa da múddeli taraptarmen belsendi ári syndarly jumys isteýge daıyn ekenderin rastady.
«Mınıstrler Gazaǵa shabýyldy toqtatý boıynsha AQSh-pen birlesip jumys isteýge degen nıetterin rastady. Keshendi kelisim aıasynda anklavqa gýmanıtarlyq kómekti úzdiksiz jetkizý, palestınalyqtardyń májbúrli qonys aýdarýyna jol bermeý, tutqyndardy bosatý, barlyq taraptardy qorǵaýǵa kepildik beretin qaýipsizdik tetigin qurý, Izraıl áskeriniń tolyqtaı shyǵarylýy, Gaza sektory ınfraqurylymyn qalpyna keltirý jáne halyqaralyq quqyq normalaryna sáıkes eki memleket negizindegi ádil beıbitshilikke qol jetkizý jolyn qalyptastyrý kózdelgen. Sondaı-aq, Gaza sektorynyń Batys jaǵalaýymen tolyq ıntegratsııalanýy qarastyrylǵan», – delingen birlesken málimdemede.
Mınıstrler bul tarmaqtardyń óńirlik turaqtylyq pen uzaq merzimdi qaýipsizdikke qol jetkizý úshin asa mańyzdy ekenin atap ótti.
Osyǵan deıin Aq úı Tramptyń Gazadaǵy jaǵdaıdy retteýge arnalǵan josparyn jarııa etkeni týraly jazdyq.