Túrkııamen parlamentaralyq seriktestikti odan ári nyǵaıtýǵa múddelimiz – Qoshanov
ANKARA. KAZINFORM – Túrkııa Uly Ulttyq Májilisiniń tóraǵasy Nýman Kýrtýlmýshtyń shaqyrýymen Májilis tóraǵasy Erlan Qoshanov jáne bir top depýtat Túrkııaǵa resmı saparmen bardy.
Ankara qalasynda depýtattar Parlament basshylyǵymen kezdesip, eki el arasyndaǵy strategııalyq áriptestik pen parlamentaralyq qarym-qatynasty damytý máselelerin talqylady.
Nýman Kýrtýlmýshpen kezdesýde Májilis tóraǵasy áriptesin Túrkııa Uly Ulttyq Májilisiniń 105 jyldyǵymen jáne Ulttyq egemendik kúnimen quttyqtady. Erlan Qoshanov 100 jylda Túrkııanyń ǵalamat jetistikterge qol jetkizgenin atap ótip, qos memlekettiń arasynda shynaıy dostyq pen týystyq baılanysqa negizdelgen berik yntymaqtastyq ornaǵanyna aıryqsha nazar aýdardy.
– Memleketterimizdiń arasyndaǵy qarym-qatynas erekshe jaqyn der edim. Bul jaqyndyǵymyzdy eki el kóshbasshylary arasyndaǵy baýyrlyq baılanystan-aq ańǵarýǵa bolady. Prezıdentterimizdiń arasynda myzǵymas dostyq, syılastyq baılanys bar. Olar óte jıi kezdesip turady. Ár kezdesýi yntymaqtastyqty tereńdetýge zor serpin beredi. Dál osyndaı dostyq qarym-qatynas Parlament deńgeıinde de qalyptasty. Alda biz óz tarapymyzdan eki el basshylarynyń ýaǵdalastyqtaryn zańnamalyq turǵyda júzege asyramyz, - dedi Palata spıkeri.
Parlamentaralyq yntymaqtastyqtyń perspektıvalary áńgimeniń ózegine aınaldy. Bul rette taraptar zań shyǵarý baǵytyndaǵy baılanysty tereńdetýge kelisti.
– Bizdiń depýtattarymyz da bir-birimen jıi kezdesip turady. Parlament – halyq ókilderi jınalatyn oryn. Sondyqtan biz halyqtyń ókilderi retinde eki eldiń tyǵyz aralasýyna, jaqyndasýyna jol ashamyz. Parlamenttik dıplomatııanyń mıssııasy da osy. Bir-birimizden úırenetin tustarymyz az emes. Biz Túrkııamen parlamentaralyq seriktestikti odan ári nyǵaıtýǵa múddelimiz, - dedi Májilis spıkeri.
Taraptar kópjaqty formatta da yqpaldastyqty tereńdetýge qyzyǵýshylyq tanytyp otyr. Bul rette Túrki memleketteri Parlamenttik Assambleıasy aıasyndaǵy jumysqa erekshe mán beriledi. Atalǵan uıymǵa tóraǵalyq bıyl Qazaqstanǵa ótedi. 11-12 maýsymda Astanada TÚRKPA-nyń otyrysy josparlanýda. Oǵan túrik tarapy qatysatynyn aıtty.
Túrkııa Uly Ulttyq Májilisiniń tóraǵasy óz sózinde qazaq-túrik yntymaqtastyǵy barlyq salada qarqyndy damı beretinin atap ótti.
– Qazaqstannyń ár jetistigine shyn qýanamyz. Byltyr Qazaqstanda resmı saparmen boldym. Prezıdent Qasym-Jomart Toqaevpen jáne Ózińizben ótken kezdesýlerde eki el arasynda baılanysty odan ári jetildirýge yqpal etetin mańyzdy taqyryptardy talqyladyq. Búgin sol áńgimeni jalǵastyryp jatyrmyz. Biz dostyq toptarymyzdyń jáne halyqaralyq uıymdardyń aıasynda birlesken jumysty nyǵaıtamyz, - dedi Nýman Kýrtýlmýsh.
Memleketaralyq qatynastardy damytýda partııaaralyq baılanystyń da mańyzy zor. Qos tarap bul salada da jumysty ilgeriletýge daıyn ekenin jetkizdi. Budan bólek, saýda-ekonomıka, aýyl sharýashylyǵy, áskerı-tehnıkalyq saladaǵy seriktestik máseleleri ortaǵa salyndy. Mádenı-gýmanıtarlyq qatynasty tereńdetý jaıy da keńinen sóz boldy.
Sapar barysynda delegatsııa músheleri Atatúrik kesenesine gúl shoqtaryn qoıý rásimine qatysyp, Mustafa Kemal Atatúriktiń rýhyna taǵzym etti. Májilis spıkeri qurmet kitabyna jazba qaldyryp, Táýelsizdik soǵysy murajaıyn jáne Prezıdent janyndaǵy Ult Kitaphanasyn aralady.