Túrkııamen ózara saýdany arttyrýǵa múddelimiz – Oljas Bektenov

ASTANA. KAZINFORM – Keıingi 20 jylda Qazaqstan Túrkııa ekonomıkasyna 2,4 mlrd dollar ınvestıtsııa saldy. Bul týraly Qazaqstan-Túrkııa ınvestıtsııalyq dóńgelek ústel otyrysynda Premer-mınıstr Oljas Bektenov aıtty. 

– Úkimetaralyq komıssııanyń otyrystary aıasynda mundaı sharalardy ótkizý ıgi dástúrge aınalyp, baýyrlas elderimiz arasyndaǵy iskerlik baılanystardy nyǵaıtatyn tıimdi alań retinde qalyptasty. Túrik memleketi biz úshin mańyzdy strategııalyq seriktes sanalady. Eki el arasyndaǵy baılanystar barlyq salada belsendi damyp kele jatqanyn atap ótkim keledi. Máselen, Qazaqstanmen ózara taýar aınalymy boıynsha Túrkııa negizgi saýda seriktesterdiń jetekshi bestigine kiredi. Ótken jyldyń qorytyndysy boıynsha ekijaqty saýda kólemi shamamen 9 paıyzǵa ósti. Biz eki el ekonomıkasynyń qolda bar rezervterin eskere otyryp, ózara saýdany arttyrýǵa múddelimiz, - dedi Oljas Bektenov.

Úkimet basshysynyń málimetinshe, sońǵy 20 jyldan astam ýaqyt ishinde túrik ınvestorlary Qazaqstan ekonomıkasyna 6 mlrd dollardan asa ınvestıtsııa quıdy. Bul rette Qazaqstannan Túrik Respýblıkasyna salynǵan ınvestıtsııalardyń jalpy aǵyny 2,4 mlrd dollarǵa jetti. 

– Qazirgi tańda elimizde túrik kapıtalynyń qatysýymen 5 myńnan astam kásiporyn tirkelip, birlesken kúsh-jigerdiń arqasynda myńdaǵan jumys oryndary ashyldy. Bul kórsetkish túrik bızesiniń bizge degen joǵary senimin bildiredi. Búginde Qazaqstanda jalpy quny shamamen 9,5 mlrd dollardy quraıtyn 170-ten astam birlesken jobalar pýly bar, - dedi Premer-mınıstr.

Aıta keteıik, búgin Túrkııa Vıtse-prezıdenti Jevdet Iylmaz ben Premer-mınıstr Oljas Bektenovtiń qatysýymen Saýda-ekonomıkalyq yntymaqtastyq jónindegi komıssııanyń 14-otyrysy ótti. Іs-shara barysynda Oljas Bektenov Qazaqstannyń Túrkııamen tyǵyz yntymaqtastyqqa daıyn baǵyttaryn atady.